أغاريد الجيل الجديد / نهائي أوبريت أنت مين
أنت مين
أنا الأزمة اللي بتعاند
فـ وش الجرح
وألاغي الفرح
فيقرّب
وأنا الدهشة اللي بتغَرّب
وأنا سؤالي اللي بيجاوب على نفسه
وأقوم نسفه
وانهي الحيرة م المواعيد!
" شاهيناز فواز "
وأنت مين ؟
وأنا الحسبة اللي حسبتها تملى الطرح..
وأنا السكر بطعم الملح..متشرب.
وأنا اللي تملى مستغرب.
وأنا العايش على أمسه.
جريح همسُه
وأقول الأه تبان تغريد
" عبد التواب محمد "
وأنت ميين ؟
وأنا أستاذ تعب قلبه
كتير م الشرح
أجيب الصُبح متغرّب
وأنا الشوق اللي متسرسب
وأنا الليل اللي بيحجر على شمسه
و أقوم لامسه
يمطّر م السما تنهيد
"أشرف عيسي "
وأنت مين؟
أنا بشرح لكم حزني
وحزني من صدى الوجدان
إذا غاب الحزن عني
مسحت دموعي بيديه
أنا مجروح في جوفي
وصوتي للألم عنوان
ونفسي ما تعاف الصبر
وهي للحزن مشتريه
أسافر في تعب عمري
مابين الشوق والحرمان
يمكن القي على الشاطئ
وله أو شوق أو حنان
أعالج به دموع العين
وأخفف حزني شويه
" أحمد سفيان "
وأنت مين؟
أنا غنوه بتترجاك
بلحن حزين بتستنــــــــــــــــــــاك
تعبها الشوق ....وجرح هــــــــواك
فاكرهــــــــــــا
ياللى لسه هنــــــــــــــاك
ولأنسيت ذكـــــــراك
" عماد أبو العلا "
وأنت مين ؟
أنا الإنسان بنيت م الحب
أكبر صرح
وأنا اللي زرعت أحزاني بذور الفرح
وأنا الضحكة اللي بتقرب
وألاقي الهم مستغرب
وأنا البسمة اللي بتحدد حدود رسمه .. وأقوم حسمه
يعيش الهم وحده شريد
" حازم القاياتي "
وأنت مين؟
وأنا التجاعيد مواسم
حزني مرسومه ف كف الإيد
م أنا اللي اشتقت للأفراح
وأنا اللي ف كل ليله مباح
وأنا المجروح من الأيام ومش جراح
وأنا اللي ف قسوتك بارتاح وقلبي شريد
نزفت الجرح فوق أسفلت أيامي اللي قاتلاني
شربت المر من عسلك وأقول تاني
سكنت فـ قبلتك تراتيل
عملت فـ عتمتك قناديل
عملت لدمعتك مناديل
وفـ الآخر لقيتني وحيد
لا أنا طايل أعيش نقطه فـ دم وريد
ولا طايل أموت فـ عنيكي نص شهيد
" أسامه الطحان "
وأنت مين؟
وأنا القدره اللي شدانى
لفوق السدره بشويه
وحلمي كان معديه
لبر هروبي م الكوكب
أنا الأغرب وأنا الأقرب
ل كون ممنوع على البشرية تتعدا
هبعدى مداه عشان رافض يعجزنى
وراضى الرفض ينجزني
غضب ع الكون وعقل عنيد
" مصطفى التمساح "
و أنت مين؟
من مجزءو الوافر المعصوب
أنا من كان منبتُه و مثواه الغدُ المشرقْ
و حسن القول آنيتي
أغبّ بذاك أو أهرقْ
حللتِ كسرتِ مشكاتي
و ما نجّان أن أصْدقْو
لي أن توئد الكلمات
من رحمي فلا تنطق
و أن تنأى تسافرني
إلى فردوسك المغدق
تلاقينا على عجلٍ
و دمع التين مغرورق
و فُرِّقنا بلا أملٍ
بلا زيتون أو زنبق
أنا أهواك فاتنتي
أنا أُسلَب..أنا أُسرَق
أما أغرقتني بالشوق
ثم مضيت مت كمدا
و قلتُ: أخون أغنيتي؟
فقلتِ: تعيش مضطهدا!
و أبذر مهجتي روحا و ينبتها الثرى جسدا
"باسم عبدالحميد"
و أنت مين؟
أنا اللي ندهت ع الصاحب
وماسمعنيش
فقلت .. ماليش
وأنا الحلم اللي ما تحققش
وأنا الصبر اللي صاحبني
ومابيزهقش
أنا الفكرة اللي سرحانة
وعايشه فـ حضن دوامه
مابتغرّقش
" شاهيناز فواز "
وأنت مين؟
أنا الصوت اللي جاب الحق
بس الحق ما نصفهوش
فـ رحت فشوش
بدون دية
وأنا اللي نصيبي م التركة
يا دوب إعجاب وأغنية
وأنا الدم اللي حنا حبيبته في فرحها
وفاتها فيوم ما فرحها
على كفوفها الأمل منقوش
" شحاته فكري "
وأنت مين؟؟؟؟؟
أنا الحرف اللي فاكره الشعر
بالعافية
وعاش تايه مابين الوزن والقافية
غريب بينكم ومتشتت علي الدواوين
بتسأل مين ?!! . . أنا الشاعر بلا ئافيه
"سعيد شكري"
و أنت مين؟؟؟؟
وأنا شاعر
بإني بعيد أوي عني
ومش عارف أقول أنا مين ؟!!!
أنا الحرف اللي كان ساكن
ومتحرك بفعل الخوف
أنا الفصلة ونقطة فـ آخر الصفحة
علامة دهشة واستفهام
أنا إنسان
بشوفني تملي من بره
وبضحك ع اللي جوايا
وبكسر وزني بالعافية
عشان ما كتبش إحساسي
أنا شاعر
بإني نسيت بحور الشعر فـ عيونها,
فـ غنولها تعيشي يا مصر !!!!!!
"شريف طايل"
و أنت مين؟؟؟؟؟؟
أنا اللي كتبت ابياتى بطمي النيل على الدلتا
وأنا اللي عاتبت اناتى وقولت العشق مش غلطه
بقيت ع العشق مش باقي
ورافض كل أوراقي
وبـ ادعى فـ كل صلواتى ياقلب العشق جك جلطه
"عبدالتواب محمد"
وأنت مين؟؟؟؟
وأنا بُكره اللي كان راسم طريقه ازاى
وكان نساي
وقلب بيرسم الأيام فـ حلم جميل
بدأ نوره يزيل الليل
وبيخطط لعمره الجاي
"شاهيناز فواز"
وأنت مين؟؟؟
أنا التحابيش في طبق الفول
أنا الفاصل
وأنا المحصول اللي مستنيكى تجنينى
أنا سنينى اللي بارت رغم المية والفيضان
أنا القضبان اللي حولتيه وقالوا عليه قليل حيلة
أنا الليلة اللي قسمتها في عيالها نهار
"عبير الراوي"
وأنت مين؟؟
وأنا اخترت أكون فكره
أكتبها اليوم على سطر
تصبح عمل لبكره
وفكر يولد مليون فكر
أنا أكتب كلمه فى كتاب
الخير دايما يغلب الشر
واجمع الخلق أحباب
على كل ما يفرح ويسر
وانشر فى القلوب أمال
وأوزع ع البخوت صبر
وأقوى همه العمال
وأقدم الكرامة بفخر
اخترت أكون للمعرفة بذره
أزرعها في كل شبر
بالعلم العقول حره
وتكتب فـ التاريخ نصر
أنا فكره وعلم وخير
أنا نور شباب حر
أنا فدا الوطن والغير
أنا أملك يا أغلى مصر
"مريم النقادي"
وأنت مين؟؟؟؟
أنا النار اللي قادت تدفي الكون ولا تحرقش
وأنا الحب اللي حب الكل حتى الكره ولا اتقدرش
وأنا الشهيد اللي باع نفسه فدي بلده ولسه ما ماتش
وأنا الصعيدي اللي سايب أهلي وعامل إني ما متغربش
وأنا اللي عايش في بحر هموم ولا بعرف أعوم و عايز اغرق ولا بغرقش
"عبده علام"
وأنت مين؟؟؟؟
أنا الفِكرَة
أنا اللي فـ يوم
هـ أكون ذِكرى
أنا الموجود لكِن عايش
فِـ رايش فَتْفَتِت حِلمي
و هَمّي إن أكون إنسان
حروفي ...
صُورة بِـ الألوان
بِـ خَلفِيه مِن الألحان
بتُسكُن جوه بيت شِعري
و تجرى تُشْبُك النِسمَة
توصَّلها على العِنوان
أنا القُبطان
ودَفِة مَركِبي سِحابَه
فِ كُل مَكان
تِضلِل مَره ع الماشي
وتِرسِم ضِحكَة للغلبان
"محمد طه"
وأنت مين؟؟؟؟
أنا القلب اللی مترددش یفتح دولته للکل
مساکم فل
یا صحبه بتعشق التغرید
وأنا اللحن اللی کل ما عمره بیعدی بیفضل برضه لحن جدید
وأنا القلب اللی شاورله القمر سلم
ولا استسلم
وقرر إنه یبقا وحید
"شحات فكري"
------------------------------------------
تتقدم صفحة أغاريد الجيل الجديد بخالص الشكر والتقدير إلى الشعراء الذين شاركوا في "أوبريت أنت مين" مع تمنيات إدارة الصفحة لهم بمزيد من التألق والإبداع.
ساحة النقاش