إنتظرتك كتير
ولما جيتي..شايف في عينك بدايه فراق
وقلبي الكبير
ناوي يسامح لو رجعتي تاني تجرحي
ناوي أحبك مهما دقت م الحب نار
ناوي قلبي يستحمل مرار
ناوي أبكي..وإنتي بس ..تفرحي

عرفت قبلك..وعرفت بعدك
وانتي إللي باقيه
حسيت في قربك..وكمان في بعدك
كإني داير مربوط في ساقيه
أروي غيطان خيرها لغيري
تطرح أمل
ويجني غيري
وانتي مش هنا
سيباني أعاني .. وبتمرحي

طب أعمل إيه
وقلبي بس ..هو إللي عندي
أديهولك
أبكي تاني وإنتي جنبي
أتوب منك..وإنتي ذنبي
ماتقوليلي أعمل أيه
لو بقيتي مطرحي