سحر جمال حبيب‏ تتالق في مربعات فن الواو

{{ و لسة بتعلم }}

يارب سعي مـا جالي
و الحظ ـ دايما ـ مخـالف
لو اسبح جوة مجالي
بلقىَ ف موجي مخاوف

.................................

و يا بختي ليه نازل
امتىَ حا تعلا لـ فوق ؟!
و لا امتى حاتنـازل
يا حظ .. اصحى وفوق

.................................

ياللي انت من ناسي
ليه .. ليّة مش صافي
و ان كنت يوم ناسي
ليه تنسىَ او صافي

................................

و النـــدل بــاين فـِـ طبـعه
فى عروقه ماشي و سايل
عــ القلب راسمه وطابعه ..
عــ الـــوش كـــاتـب رسايل

...................................

البخت مــــايل و عـــــادي
و مِيــله قسّملى ضهـــرى
ما اعـرفش امتى معــادي ؟
كـان يمكـن بـان لـه ضُهـرى ...

....................................

كداب و كدبك مرض بيك
و طـايح بنتنا و شـايخ
عِلّة و حمل ع المرا بيك
من رقوة لزور المشايخ

....................................

عالقـــلب والله مافــــارق
تجيـنى ولا .. ماتـــــاجى
دنا ياما خوضت ف مفارق
و دوست ناس كانوا تاجي

................................

يا زمني ـ قـــلّ مقداري ؟!
والحزن شايفه .. وجابلني
و الفرح عمره ما جا داري
و لا مـــرة حتىَ .. قبّلني

................................

ع لله جبـــــر الخواطر
قالوها من قِبل .. ناسنا
ان كنت قِدّ المخاطر
اوقعد ــ بنتنا .. و اناسنا

...............................

غلطان و غلّطك دا راكبك
و ختمه ما بين جبينك
حاتسري بنتنا .. مراكبك
و لا حنا ــــ ما عجبينك