‏أميرة البدرى‏

مش جاى اجادل
ولايوم صادفنى
حلم إنك
تبقى عادل
ليه افتريت ؟
لما لقيت الكل بكم؟!!
القلب مات فيه الأمل
ودموعى نزلت م الوريد
ولقيتنى ف القمقم حبيس
أنده وصوتى مايسمعوش
غيرى أنا
والحيط مدارى
والحكم سارى
ولكل واحد ألفْ قمقم
جنب منه مشنقة
أحلامه فيها معّلقة
يعنى مفيش أى اعتراض
والحبس والموت
ف الطريق
كنت الصديق
ولا مرة صدقت كلمتك
غير ف العذاب
ولمين هنا يكون العتاب؟؟
مين الحكيم؟؟
بالحكمة يجى يدلنى
هو آنا جنّى وكنت عاصى
واشكى لمين ؟؟
وبأمرك انت حبستى
وفضلت اسأل هو أنا
كان ذنبى إيه !!
لاظلمت حد
ولا اشتكانى
والسيره خير
لو مرة جت مسّت لسانى
يعنى أنا ماشية تمام
وراضية بالحكم اللى مكتوب
ع الجبين
والصبر مرّر كل طعم
من السنين
أشكى لمين؟؟
والذل حاوط كل غصن
بيتولد
أو يبتسم فيه الأمل
باين نسيت
كتر الهوان
خلانى مارد
بجناحه فارد ريش محبةع البشر
يمسح دموع المظلومين
ويزرع الضحكة شجر
أوراقه بتضلل بشوق
على جرح ف القلب الحزين
يطرح فرح
وهدوقك م الظلم كاس
تصرخ يا ناس
أشكى لمين ؟؟
أميرة البدرى l أوتار قلم