سؤال نفسي الاقي إجابته قبل فوات الوقت ؛ مش عارفة لما الواحد يبقى متوتر ممكن يفكر أحسن و لا أوحش ؛ من الكتاب بيقولوا أوحش بس أنا احاسة أن وصفة الكتاب مش صح ؛ الظاهر التوتر اللي بيقى فيه حياة أو موت بيصحي كل القوة اللي جواك .. بيصحي فيك نقاط ضعفك زي نقاط قوتك .. بيخليك تكره نقاط ضعفك تكره خوفك و ألمك .. و ده مفيد .                                        

تصدقوا أن ممكن ناس كتير مش عارفة تركز و تفكر في واجب الوقت ؛ يمكن عشان عمري مثلا ما فكرت أن ده هيحصل " على حياة عيني " فمفكرتش و لو من باب التخيل اللي كتير قوي بعمله – عادي يعني – ممكن لما تقوم مظاهرة و مطالب من النوع مكاني هيبقى فين .. أظن أن كتير ممن الناس كده ؛ لما اسأل طب ممكن نعمل إيه دلوقت يكون الرد : " مش عارف " . هو حاسس و شايف و كل جوارجه مع اللي بيحصل بس نعمل إيه : " محتاجين تفكير " يا رب نوصل قبل فوات الأوان . .

طيب لو كل واحد مش عارف يفكر و طبعا مش هيعرف ينفذ لوحده ؛ تعالوا نفكر مع بعض إيه كل اللي ممكن نعمله و ممكن نستثمر اللحظة دي علشان نوصله .كل واحد فينا بيشوف حتة غير التامي و ده أميز وقت نستفيد من فروقنا دي و اختلافاتنا الكتيرة اللي عمرنا ما استثمرناها .

تعاولوا نشوف نعمل إيه بره الميدان علشان نخللي نحافظ على ثبات الميدان ؛ اللي في الميدان أعتقد مركزين قوي قي الميدان و تواصلهم مع السلطة و التفاوضات و ما إليه ؛ و في الحقيقة ده مهم جد اجدا جدا لكن كمان مش لازم ننسى أهمية حشد الناس مع الثورة ؛ حشد الناس خلف الثورة ؛ حشد الناس ليناصروا و يعاضدوا الثورة ..حشد الناس للحفاظ على روح الثورة ..

خايفة جدا تهبد الروح و منعرفش نرفعها تاني .. فيه مثلا ناس احنا محتاجين نفكر فيهم زي مجموعة الناس اللي في البيت و لو حصل مهما حصل مش هينزلوا الميدان لأسباب كتيرة ؛ دول مهمين جدا و قلبهم في الميدان و عقلهم ممكن يشتغل لصالح الميدان من براه ؛ يبقى ليه منستفدش منهم فهو اكيد أي حاجة محتاجة كذا دور مش لازم كلنا نعمل نفس الدور .. لكن إيه هي بقى تفاصيل الدور اللي من بره دي محتاجين نفكر و نعرف و نشوف إزاي هننفذ .. عندنا كمية مراهقين لو بس اتقالهم اعملوا هيعملوا بدل ما هم بيتفرجوا .. محتاجين الناس تحس بانها شريكة في اللي بيحصل مش بس بقلبها بس كمان بشوية مهام ممكن تؤديها .. عاوزين مهام للي في البيت ؛ عاوزين مهام بره الميدان ؛ عاوزين مهام للشباب الصغير على الأقل علشان نحافظ على الناس دي شريكة في الثورة و داعمة لها ..على الأقل لو قلنا يعني أن الثورة مش محتاجاهم و طبعا ده بعيد قوي قوي عن الحقيقة .

تعالوا نشوف ممكن نقول إيه لولادنا .. طب هما ممكن يسألوا عن إيه ؟ طب لو مسألوش نقول لهم احنا  إيه ؟ .

تعالوا نفكر إيه كل الأفكار اللي ممكن تحشد الناس ورا الثورة .

تعاولوا نفكر في فكرة تجييش مشاعر الناس  ..

تعاولا نفكر هو لو إيه ظهر في الإعلام يبقى لصالح الثورة ؛ و نعمله بالقصد إزاي .

تعالوا نشوف إزاي نستفيد من الروح اللي في ميدان التحرير علشان تعيش أطوق فترة و نبني عليها .

تعالوا نفكر في كل الطرق اللي ممكن نرصد بها الأكاذيب و نرد عليها علشان نخلي الناس تعرف صح و تفكر صح و تاخد قرار صح .

تعالوا نفكر إزاي نعلم الناس خطوة خطوة " أب سياسة " من غير كلام تخين مجعلص محدش يفهمه لحد ما ناس كتير ادت ظهرها للترعة " للسياسة " لأنها مش فاهمة حاجة و مش عارفة تفهم و حاسة أن اللي بيقال ده مش ليها و لا عليها و لا هي جزء منه .

تعالوا نفكر إزاي نخلي  كل واحد في الشعب ده يبقى حاسس أن الثورة دي بتاعته و هو حتة منها و حتة ليها بدل ما تنفض الليلة و احنا بنقسم مين معانا و مين علينا .

تعالوا نفكر إيه كل الطرق اللي ممكن نستثمر بيها طاقة الحاجة و تمانين مليون لصالح حلم قومي مشترك . تعالوا نفهم الناس ليه هو ده الحلم اللي لو ضاع مش هنلحق غيره في حياتنا القصيرة اللي باقية .

تعالوا نفكر سوا و نعمل سوا ..
تيجوا نعمل الحاجة اللي اسمها عصف ذهني جماعي " طريقة لتوليد أفكار جماعية حول نقطة محددة " .. تعالو نتعلم و ننفذ أننا نفكر سوا و نعمل حاجة سوا  ..

عصف جماعي هي دي الخطوة اللي ممكن نعملها دلوقت .. تعالوا نعصف بأة !!!

الصفحة الخاصة بالعصف الجماعي تحت عنوان " واجب الوقت /عصف ذهني جماعي  " .

                                   http://www.facebook.com/pages/wajb-alwqt-sf-dhhny-jmay/191823064169034?v=app_2373072738