هو صحيح ممكن إنسان يحب ربنا و مش يحب الناس ؟

فكرت و جت في دماغي فكرة قرأتها كتير قوي بس عمري ما شفتها كده .. الفكرة دي بتقول أن فيه دوائر علاقات الإنسان بيتحرك فيها بالترتيب أو مش بالترتيب ؛ الدوائر دي هي علاقته بربنا ؛ علاقته بنفسه ؛ علاقته باسرته  علاقته بالمجتمع ..

بس عمري ما جت في دماغي أنه فعلا اللي بيحب ربنا – أظن – غالبا هيحب الناس .

لأن الإيمان على المحك هو قدرتك على أنك تكون إنسان بجد و و بيبان الإنسان من عدمه لو احتك بأخيه الإنسان : هل قبله ؛ حبه ؛ قدر على غلاسته ؛ عرف ضعفه و تحمله و شد على إيده .. لو واحد مؤمن بجد تلاقيه فعلا قادر يعمل كده بمجهود أقل .و هو الإيمان إيه أكتر من كده ؟ هو فيه إيمان في فراغ ؛ في دنيا فاضية : هو فيه عاصي في دنيا فاضية ؛ هو فيه مجرم غير لو فيه حد يمارس عليه إجرامه علشان يلم من الإجرام ده شوية حاجت  تعينه على التعامل مع آخر برضة بعد إجرامه .

غريبة البني آدم ده !!!!

مش عارفة ليه – و مش لازم اعرف أصلا – قادتني الفكرة دي لفكرة أختها التوأم ؛ ماشية في عقلي إزاي : هقولك أهوه :

الحاجات اللي بجد غالبا بتقربك من الحياة مش تبعدك عنها ؛ و تحسن الحياة مش تسوأها و تلوثها ..

 يعني مثلا التدين اللي بجد يخليك تنبي في الحياة و تحب البني آدمين فتعيش معاهم حياة جميلة و تتمنى صحبتهم طبعا في الحياة الآخرة ..

 و العلم اللي بجد يحسن و يبني الحياة و يطورها و ينورها على اعتبار أن العلم اللي بجد نور ..

و كمان الحب اللي بجد يخليك ماسك إيد حبيبك و داخلين كده بقلب على الحياة مش قاعد في الظل في فيلم أبيض و أسود في بيت صغير فوق جزيرة لوحدكم " .. الحب اللي بجد حب يبني و يخليك ملتحم بالحياة مش متجنبها و لا هايبها و لا مديها ظاهرك و سايبها ..

يا نهار أبيض ده على كده حاجات كتير من اللي المفروض تكون جد ممكن غالبا يعني مش بجد و لا حاجة ؛ بالعكس الظاهر أنها  مضروبة ..

تيجي المرحلة التانية من التفكير المتفاءل بأه : طيب إزاي نخللي الحاجات تبقى جد و حقيقية و تنبي الحياة ؟

أكيد بفكر و محتاجين كلنانفكر في السؤال ده طول ما احنا عايشيين و لسه بنتنفس و متفاءلين .

عندي فكرة تانية برضة مربوطة بالأولى اللي هي أختها التوأم ؛ بص يا سيدي:

الظاهر كمان أن الحاجات الجد بسيطة مش محتاجة تتمنظر علشان تبان و يظهر لها قيمة ؛ يعني مثلا :

العلم اللي بجد مش محتاج جعلصة و كلام تخين يشبه كلام السحرة ..

و الحب اللي بجد مش محتاج لنش في عرض البحر و لا طيارة مربوطة على أوسع شارع في مصر و لا عربية سبور شايلة يافطة و الف و ادور بيها على خلق الله كلهم احلف أن أحمد بيحب منى ..

 و لا التدين اللي بجد محتاج مليون جزاك الله خيرا في الدقيقة ؛ و لا ربع مليون إن شاء الله بين كل كلمة و كلمة .. و لا حاجات كتير قوي مش عارفة موجودة ليه و لزمتها إيه و لا حتى علاقتها إيه بالإيمان الحقيقي ..

 حتى السعادة اللي بجد مش محتاجه تعمل بهلوان و تمشى على البحر حافي ترش اللي جنبك بالمية علشان تبين قوي قوي يعني أنك سعيد و منتشي ..

ممكن تفرح ببساطة و تعرف ببساطة و تتعلم ببساطة و تنقل العلم ببساطة و تحب ببساطة و تعيش الحياة كلها كده من أولها لآخرها ببساطة ..

يحصل إيه يعني لو بطلنا فزلكة و كلام تخين و مناظر من غير محتوى ..

و الله هنكون أسعد أكيد و الحياة هتتطور أكيد ..

آسفة على فكرة مفيش أي حاجة أكيد .. غير شوية حاجات " هامة جدا و  "بسيطة  جدا هي اللي أكيد علشان بس محدش يفهم غلط و أقضي الباقي من عمري في حكايات مش بجد و مش بسيطة !