مجلة عشاق الشعر الالكترونيه .. ممدوح حنفي
أنا مش رقم فى معادلتك
ولا شرط اوافق إنى احلم
يوم ما اقابل سـِحنـِتـَـك
أنفد بجلدى من رصاصك
وارضى بالقهر ف بلاطك
واعمل انى عقلى غايب
مـَحنى ضهرى
شـَعرى شايب
لجل اعيش
طـُظ فيها أى عيشة
بعد ما تلـبـِّـس عساكرك
شال وبيشة
لجل ما يرفع سلاحـُه
حتى وشه ما نعرفه
كل حق
وكل عـَدل تزيـّفـُه
والنهار تغتال صباحه
قول بربك
ليه سلاحك بس عارف
كل سكة لقلب اخوك
ليه سلاحك
عامى عن كل السّـكـَك
يطلق رصاصه
على قلب أمى اللى اتحرق
والدم يكتب ع الورق
عن حـِلم شاغل عقلنا
يـِرسـِم لـِنـا
دايرة ورق
نـَـفـَـسـى اتـخـَـنـَــق
مش من بارود
ولا طـَعــم غــــاز
روحى اللى كانت من إزاز
شفافة ... شوافة
حولتها لروح
ياما تحلم بالقصاص
إبليس زرأ
شخبط على كل الورق
والكلمة تتعايق على
كل السطور
مجرورة يا كلمة أنا
لما تشوفى الضلمة نور
والشدة قيد على كل الكلام
والسطر بيحاول يقاوم
والقلم
بيرسم الفاتحة
على الشبابيك
يفتح شبابيك الأمل
ميت ألف شيش
ترباس نحاس
ميت ألف قفل
والسلاسل من حديد
ما يهمنيش
رص البنادق ع السطور
وقف حرس على كل الكلام
الكلمة مش جتة
تموتها طلقة رصاص
الكلمة شايلة ألف فكرة
جاية حتماً بالخلاص
..................
بـــقـــلـــــم ا لــــشــــــا عــــــــــر
أ بــــو عــــمـــــــــا ر ا لــــمــــصــــــــــر ى
ساحة النقاش