كتبت : مى عبدالله

يعيش الآن الفنان الشعبى شعبان عبد الرحيم حالة انتعاشة فنية ، حيث يجهز لافتتاح قناة باسمه اكد انها ستكون افضل من اى محطة موجودة الان على الساحة الفنية ، كما إنه مشغول بدعمه وتأييده لعمرو موسى وهجومه علي بقية المرشحين للرئاسة ..كل هذا واكثر سنعرف تفاصيله من شعبولا فى الحوار التالى.

ما حكاية القناة التى ستطلقها باسمك؟
الموضوع  إن فيه واحد حبيبى عراقى الجنسية عنده قناة اسمها  "او يو سى" وفى مرة كنت بهزر معه فطلبت منه ان يفتح لى قناة باسمى وفجأة ارسل الكاميرات و العدة والموضوع دخل فى الجد على اساس اننا هنفتح قناة "او يو سى شعبولا " العراقية على اساس انه سيكون شريكاً برأس المال وانا شريكاً باسمى .
وما الذى سيميز القناة العراقية عن القناة المصرية؟
"او يو سى" العراقية هى قناة كان فاتحها الدكتور كدعاية لنفسه وكانت خالية من الافلام والاغانى لكن "او يو ىشعبولا" هيكون فيها كل حاجة ، افلام واغانى وبرامج يعنى من الاخر هى قناة متنوعة .
وهل ستضم مذيعين معروفين ؟
انا جبت 4 مذيعين مش معروفين قوى لكن فيه منهم واحد كان في المحور وواحد كان في دريم .
وهل ستقدم برنامجاً على قناتك؟
سيكون لى برنامج " قصة حياتى " أجهز فيه وسنفتتح الارسال بهذا البرنامج ، وحاليا انا سجلت الذكريات على شريط والمؤلف اسلام خليل اخذ هذا التسجيلات لكى يقطعها وسيتم عرض ربع ساعة كل يوم منه بالاضافة الى عرض كليباتى على القناة بشكل مستمر .
وهل بالفعل هذه القناة مفتوحة لتأييد عمرو موسى؟
هذا الموضوع من ضمن خطط القناة سنركز على الدعاية الخاصة بعمرو موسى المرشح لرئاسة الجمهورية .
وهل ستعرض باقى البرامج الانتخابية لباقى المرشحين؟
لا طبعا القناة هتعرض عمرو موسى بس.
لكن من المفترض ان تكون القناة حيادية وتعرض وجهة نظر باقى المرشحين؟
والله انا لا اعرف باقى المرشحين ، اعرف عمرو موسى فقط وأكيد لازم اقف جنبه لكن الناس التانية معرفش جاءوا من اين ؟ وكمان لا يعقل انى اقول انا بحب عمرو موسى وفى نفس الوقت اقول انا بحب واحد تانى ... وعلى فكرة انا مش بكره حد فيهم .
هل هناك تنسيق بينك وبين عمرو موسى لتنظيم خطوات الدعاية ؟
لا ابدا هو انا فعلا قابلت عمرو موسى ولسه بقابله كل لما الظروف تسمح ولكن عمرنا ما اتكلمنا عن القناة ، وعلى فكرة عمرو موسى لم يدفع مليماً واحداً فى المحطة دى زي ما نشرت جرائد كثيرة .
وهل تتوقع إن هذه القناة ستنافس القنوات الموجودة حاليا على الساحة؟
لو الوضع مشى بما يرضى الله سواء داخل القناة او خارجها الدنيا هتبقى تمام ، لكن لو حد اتكلم على زميله فأكيد القناة هتقفل ، ولو لم يحدث ذلك هذه القناة ستكون احسن من اى محطة اخرى .
ما السبب وراء ندرة إذاعة أغانيك على قنوات الغناء الشعبى التى فتحت مؤخرا؟
انا لم ارسل لهم اغانى اساسا وكل الناس لاحظت ذلك وصاحب قناة مصراوية بيقول إزاى انا قناة شعبية ومش عندى شعبان عبد الرحيم  ، لكن للاسف مش هينفع اعرض اغانى هناك لانى سأعرضها على قناتى الان .
البعض يقول إن اذاعة اغانى عبد الباسط  حمودة على هذه القنوات هو السبب الذى منعك من إذاعة اغانيك عندهم ؟
لا اطلاقا لا توجد مشاكل بينى وبين عبد الباسط ، فهو زميل مهنة واى مطرب انا لازم اشيله فوق دماغي ، ولو انا زعلان من عبد الباسط مش هروح المحطة ليه؟ وعلى فكرة انا اخذت اغانى عبد الباسط من المطربة هدى وسأعرضها فى القناة عندى .
وما اخبار السينما عندك؟
لا انا مريح من السينما هذه الايام لانه مفيش أفلام على دماغى !! .
ماذا سيفعل شعبان عبد الريحم لو وصل الاخوان او السلفيون إلى الحكم ؟!
والله لو منعوا الغناء سأتجه الى التواشيح والانشاد الدينى والذكر ، اصل لازم امشى مع الجو لانى مش هقدر ابطل غناء !! .
وماذا تقول للمتظاهرين فى التحرير ؟
انتم عملتوا حاجات جميلة وربنا يكافئكم عليها خير لكن كفاية لحد كده .. الدنيا خلاص هتولع والبلد هتتحرق وياريت تحسوا شوية بأبو العيال اللى مش لاقى اللقمة والمصالح اللي واقفة ، كل ما تعملوا مظاهرات الدنيا بتتعقد وكمان الدنيا برد والبطاطين غالية ..أمشوا من الميدان بقى !!.

http://www.youtube.com/watch?feature=player_embedded&v=YTiTAtw3pSg