بقلمي - عادل عبد الرازق
-----------------------خوّانة كل الحكاية
وانا وانتي لسه بنتقابل
وانتي قابلة
وانا قابل
لونك غريب اللون
والحرف تايه في الكلام
شاور عليكي قلبي
واتاريكي عتمة وضلام
كل اللي كان
كان
والزمان
مابقاش زمان
اللي باع باع
واللي خان .. خان
ولا كملت جوّانا الغنواية
خوّانة كل الحكاية
...
متهرّبة فينا الملامح
والملامح لون الوشوش
طع الحكاية مرّ طارح
والطريق ما بنعرفوش
شبايك قلبك واتقفّلت
والدمعة ف عيوني صهللت
وحدودي ضاقت في حيطان مدايا
خوّانة كل الحكاية
...
تتصوري..
إني عشقتك رغم رفضي
تتصوري
إني عشقتك رغم خوفي
ولضمت قلبك في حكايتي
وانتي بعترتي حروفي
حبتيني آه
لكن سراب
وابتدينا أه
لكن عذاب
وانا لمّا صورتك مدا كوني
مدّيتي يدّك بالنهاية
خوّانك كل الحكاية
م البداية للنهاية
خوّانة كل الحكاية
***
