سألنى الحب
======
 
سألنى الحب ليه مش عايز تحب
قلتله روح يا حب معدش عندى قلب
 
انا قلبى جوه قلمى والورقه جسد
قلبى كره الحب وقلمى هو النبض
 
لا عمره جرحنى ولا شفت منه غدر
فى ايدى بيطاوعنى عمره ما قال لى لأ
 
هو بس حبيبى وعمرى ما راح احب
مولود وهو فى ايدى وبعشق الحرف
 
ابعد يا حب عنى قلبى مش ملك حد
مهما تلف علىّ مش هحب أى ست
 
قلمى جوه قلبى سيف مستنى اى حد
اللى يدخله يموت او يهرب منه جرى
 
ضحك الحب وقال لى انت ملكش قلب
د الحب نعمه يا جاهل خليك ويا الغلب
 
لو يوم قلبك حب راح تفهم معنى الحب
القلم عما عيونك خلاك مش شايف الحب
 
دايما تكتب بدموعك كلامك كله ع الحزن
الحزن اصبح صديقك يا عايش ويا الوهم
 
بص حواليك تشوفه ليه انت كرهت الحب
د الحب هو الامل من غيره تعيش فى يأس
 
انت بتحب ورقه لا فيها احساس ولا دم
القلم صديقك خاين منه ييجى كل الشر
 
قلت للحب طب قوللى فين الحب
فين القاه فى دنيا مليانه غش وغدر
 
ازاى اقدر اشوفه وعنيه مليانه بالدمع
ازاى احب وانت يا حب جرحت القلب
 
مشيت كتير فى سكتك وقلبى اتذل
ناديت عليك بالصدق  لقيتك كذب
 
رويتك من حنان قلبى روتنى غدر
مشيت معاك توهتنى وندمت بجد
 
جسد الورقه عندى اجمل من اى ست
بشكله انا بقلمى  وبرسمه زى ما احب
 
سلام يا حب وسلملى على الضحيه قيس
اسأله مين موتك راح يقولك انت يا حب
 
=======
قلم / الصابر