شفيقٌ يا راجل يا راجل شفيق

دقيقنا    ف ِ زيتنا  و زيتنا   ف دقيق

خبرة قديمة  وبلاص عتيق

شفيقٌ يا راجل يا راجل شفيق

صوتك أمانة  فَ حطُّه بْسكات

وغمّض عيونك وانسى اللي فات

مات اللي يحيا  و يحيا  اللي مات

كمّل بموتك لأخر الطريق

شفيقٌ يا راجل يا راجل شفيق

عزيزي المواطن إياك تغيّر

دانت الكبير في الهموم  مش صُغيرّ

منحّس  وجلدك تخين  وْمجيّر

تتعب لو يبقى جلدك رقيق

شفيقٌ يا راجل يا راجل شفيق

ولا يْبعش عشرة غير  ابن الحرام

تخونك حياتك ف ِ عتمة وضلام

كرامة .... عدالة .... كلُّه كلام

فالصو بيخدع برنّة وبريق

شفيقٌ يا راجل يا راجل شفيق

ابن الحكومة وابن الأصول

محنك وقاري فِ علم الوصول

واخد طريق الاتحاد والحلول

إيده المباركة هاتطفي الحريق

شفيقٌ يا راجل يا راجل شفيق

مين اللي عدّى بلدنا بأمان

وشال مسؤولية .... ولا كان جبان

خبّى الأدلة  و هرّب شِطان

ف َ عدّت بلدنا أصعب مضيق

شفيقٌ يا راجل يا راجل شفيق

تواضُع وباين فِ لِبس البلوفر

لا فيه حاجة زايدة ولا حاجة أووفر

ولا ليه مخالب ولا حتى ضوفر

حياء العذارى بحق و حقيق

شفيقٌ يا راجل يا راجل شفيق

قديمك أمامك كمّّّل و روح

ليه راح تحوّد  .. تاريخك يروح

إيه للمواطن  ف ِ سقف الطموح

زريبة وساقية وحبّة عليق

شفيقٌ يا راجل يا راجل شفيق

هتافك يواصل فِ ليلك  نهار

وصوتك بيعلا بألفين شعار

ما يتحققوش عليك يبقى عار

تهتف فيطلع هتافك نهيق

شفيقٌ يا راجل يا راجل شفيق

بتحسبها يعني بكتر الهتاف

هاتقدر تغيّر سنينها العجاف

قالولك دي ثورة شبابها النضاف

دي موجة أونطة .... راكبها  غريق

شفيقٌ يا راجل يا راجل شفيق

ليه المغامرة  ..... ليه الجنون

ليه ترمي نفسك   فِ بحر الظنون

دا  ربّك مسيّرها بين كاف ونون

 فَ مصمص شفايفك و لبلع ف ِ ريق

شفيقٌ يا راجل يا راجل شفيق

اشغل حياتك بحسن الختام

سيبك من الدنيا سيب الأنام

سيب حتى نفسك وغمّض ونام

اجعل سكاتك أحسن رفيق

شفيقٌ يا راجل يا راجل شفيق