مش هي دي ثورة يناير
أنا شكلي بحلم فوقوني ياتريحوني وتقتلوني
معرفش ليه بتعذبوني؟؟ من أغلى حاجة بتسرقوني
ثورة غضب راحت بلاش ونجاحها راح بين يوم وليلة
طب وين غضب شعبي اللي عاش وسط الجراح في سنين طويلة ؟؟
فوقنا في يوم وعملنا ثورة علشان تفوق فيها الضماير
طب كيف قولولي هتبقى ثورة وإحنا بنلم في خساير ؟؟؟
ياشعب مصر وياللي ثاير ماتقولي وين ماشي ورايح ؟؟
مش هي دي ثورة يناير دي بلدنا مليانه فضايح
أمنا ناس من شعبنا علشان تجيب حق الشهيد
لكن مطلعوش منناخلوا الفساد فينا يزيد
ماتقولوا ليه بإيديكوا انتوا قتلتوا روح الشعب كله ؟؟
دا الشعب أمنكوا وخنتوا دلوقتي تايه مين يدله ؟؟؟؟
وديتوا وين دم الشهيد اللي اتقتل ؟؟ علشان في حرية نعيش ؟؟
ماتقولوا مين فينا البطل ؟؟ ولا إحنا أصلا ما نساويش ؟؟؟
إنسان وحيد يبقى بطل راجل شجاع
هو الشهيد اللي اتقنل وعشانا ضاع
ماتقولوا وين دم البطل ؟؟ دلوقتي ليه مبنعرفوش ؟؟؟
ضيعتوا حق اللي اتقتل واللي قتل ما حاكمناهوش
مات الشهيد وف صغر سنة وامه حزينة وقاعدة تبكي
وأما في شعري كتبت عنه كنتوا بتبكوا لما بحكي
معرفش كنتوا بتبكوا ليه ؟؟؟ إذا كنتوا مش عارفين غلاوته
ماتقولوا بس جرالكم ايه ؟؟؟ زهقنا من الظلم وقساوته
مات الشهيد الثورجي إبن الميدان
علشان يعيش البلطجي إبن الجبان
ونسيتوا حرقة قلب أمه.. ما ضناها كان سبب انتصاركوا
أمه اللي شالت ياما همه.. وف لحظة سابها عشان خاطركوا
وأنتوا ما صونتوش اللي عمله ولا حتى رديتوا جمايله
في الصحرا خدتوا منه جمله صاحبه اللي كان على ضهره شايله
وإداكوا جمله عشان تعيشوا مع إنه غالي كتير عليه
وف عز جوعه أكلتوا عيشه والفرحة كانت بين عينيه
وديتوا بس دا كله فين ؟؟؟؟ يا أهل البلد يا أهلنا
دم الشهيد هيجيبه مين ؟؟؟؟ ما الدم دا من دمنا
مش هي دي ثورة يناير اللي نضفنا وراها
فضلنا نبني في العماير وبإيدنا إحنا هديناها
طب واللي ضحى دا ذنبه إيه ؟؟؟؟ ضحى وعاش اللي غدر
ضيعتوا حقه بس ليه ؟؟؟؟؟؟؟؟؟؟ خليتوا دمه يروح هدر
مش هي دي ثورة يناير ... اللي كانت في الميدان
واللي كشفت الستاير .... واللي بيها الظلم بان
ياخسارة على ثورة يناير سرقوها حبة بصمجية
حطوها في شوية شكاير تتباع في سوق البلطجية
ضاعت خلاص ثورة غضب حسدونا والله واتنفسنا
ضاعت عشان ظلم وشغب كتموا على روحنا ونفسنا
طب وين قولولي الثورجية ؟؟؟ اللي كانوا بيهتفوا جوا الميدان ؟؟
خايف ليبقوا البصمجية ؟؟؟ اللي باعوا واختفوا بين الحيطان
بنده عليكوا يا ثورجية ياللي كنتوا في الميدان
شمتوا فيكوا البلطجية والظلم أكتر من زمان
يا أهل البلد ليه الأذيه ؟؟؟ دي بلدنا مش ناقصة خراب
ثورتنا راحت ليه ضحية ؟؟؟ ما كفاية عشنا في العذاب
ماتقولوا ليه بتسجنونا ؟؟؟؟؟؟؟؟؟ دا الشعب نفسه يبقى حر
للحلو ليه بتدوقونا ؟؟؟؟؟؟؟؟؟؟؟ لما انتوا ناويين تسقوا مر
للحلو ليه بتدوقونا ؟؟؟؟؟؟؟؟؟؟؟
لما انتوا ناويين تسقوا مر
كلمات الشاعر : أحمد الحجاوي
http://kenanaonline.com/users/ahmedhego/topics/78447
<photo id=1></photo>
<photo id=2></photo>
<photo id=3></photo>
ساحة النقاش