قصيدة بعنوان (مسلم ومسيحي) عن الوحدة الوطنية
كلمات الشاعر أحمد الحجاوي
شوفوا البلد يا اهل البلد دا الحب جواكوا اتولد
وف لحظة سابكوا وراح شرد ماتخافوا حبة عالبلد
إيه يعني مسلم ومسيحي .. ماتقولوا ياناس ردوا عليا
ماهو مصري زيي ومن بلدي .. خايف عليكوا وعليا
عايشين هدفنا ياناس واحد غالي علينا
نحمي البلد ولا نتباعد عن بعضينا
دي الفتنة عايزة تفرقنا وتموتنا وتبعد فينا
ياأهل البلد هتغرقنا بلاش نعادي ف بعضينا
ونارها قاعدة بتحرقنا وبتلسعنا
وصوتها عالي بيقلقنا وبيوجعنا
وبلدنا مش ناقصة مشاكل في الوقت دا مش فاضيالنا
دا الغرب عايز يتشاكل حالف ما هيسيبنا في حالنا
عمال يوقع في بلادنا ويقول هياخد أراضينا
وبإيدنا قتل في ولادنا علشان يخش في وسطينا
إيه يعني مسلم ومسيحي فوقوا ياناس دول أهالينا
لازم نصفي خلافتنا ونروح نحارب أعادينا
فوقوا بقى !!!!
فوقوا بقى شوفوا البلد مستنياكوا
شاف الشقى اصغر ولد واحتار معاكوا
دا أنا ربي قالي في قرأنه وسط أياته
خلي المسيحي في مكانه وف عبادته
أنا ليا ديني وليه دينه مالي وماله
لا أجرح كرامته ولا أهينه خليه ف حاله
فوقوا بقى يا أهل البلد دي بلدنا طول العمر حرة
دا الحب ع أيديكوا شرد والدنيا من غير حب مرة
صوت الجرس جمب الادان عمال ينادي
فين الحماية والأمان يا أولاد بلادي ؟؟؟
فيا مسلم أنت ويا مسيحي هاتوا أيديكوا
احموا بلدكوا وخلوها جوا عنيكوا
دا انا كنت أصلي وحداني جوا التحرير
جمب المسيحي النصراني أبو قلب كبير
كنت أما أصلي بيحميني وبيحرسني
من شخص دينه من ديني بيموتني
وأنا بردو دايما كنت أحميه ولا يوم سيبته
وأحمي الكنيسة وأكون حواليه وأحرس عيلته
ماتقولوا إيه بس جرالكوا ؟؟ ردوا عليا
حب الوطن ولا على بالكوا !! فوقوا شوية
قاعد بيصرخ وينادي وبصوت عالي
ويقول هموت أنا يا أولادي م اللي جرالي
وولاده بردو ولا سألين معرفش أمتى هيفوقوا ؟؟؟
جرحه بينزف ولا حاسين والدم خلص ف عروقه
يارب ياعالم بينا ياريت تسمعنا
أنت اللي قادر تهدينا وتجمعنا
كلمات الشاعر: أحمد الحجاوي
ساحة النقاش