قصيدة بعنوان (ارحل) تخاطب الرئيس السابق (مبارك ) قبل التنحي
كل الشعب بيقلك امشي وانت كأنك مابتسمعشي
وليل نهار بيقول كفاية ماتقولي ايه بس الحكاية ؟؟
اسمعني بس وخليك معايا دا شعبك بيشكي ومحتاج عناية
أنا مني واحد وف سني صغير وبقلك كفاااااااااية ولازم نغير
دا ياما صبرنا وطال انتظارنا وحكومتك وحزبك سرقوا فطارنا
وحزبك دا واطي وبوظ حياتنا وكان ذكرى سودا ما بين ذكرياتنا
وصفوت شريفك واحمد نظيفك باعوا جنابك وضربوك بسيفك
وهما اللي خلوا شعبك عنيف مع انه كان طيب وأليف
واحمد عز وفتحي سرورك كتبوا الظلم في وسط سطورك
شوفت ازاي مبقاش فيه رحمة ؟؟ دول هما أساسا سبب الزحمة
طلعنا وقلنا ياعالم كفاية ومحدش سمعنا وفهم الحكاية
وف لحظة سودا خلص الكلام و قلب شعبك مات م الآلام
دي حكومتك باعتنا وسرقت غدانا كفاية دا شعبك ووطنك أمانه
كويس ياريس ولو مش كويس لازم نغير وكفايا ياريس
غيرت الحكومة اللي ظلمت في لحظة بقولها لجنابك ومن غير مؤاخذه
دا شعبك بيفهم وعايز مطالبه ولازم بسرعة تشوف اللي طالبه
رسالة ياريس بقولها بسرور كفاية ندالة وظلم وغرور
طلعنا في مظاهرة وقلنا خلاص وعدلي حبيبك ضربنا برصاص
وقلنا بعلو الصوت سلمية سلمية لقيت جثة اخويا عالأرض مرمية
وأمنك في لحظة اختفى معرفش مين سحره ؟؟ ظباطه وعساكره اتجمعوا ورحلوا
وسابونا في الشدة والشعب محتاجلهم والشعب ضحى بدمه ما الدم دا دمهم
معرفش ليه مشيوا ؟ ومين اللي وسوسلهم ؟؟ والله دم الشهدا حالف ليرجعلهم
ارحل بقول يا مبارك من غير كلام وحوار وكفاية عشنا سينين في خراب وموت ودمار
ولازم سرور يمشي ومجلسه ينحل وياخد معاه صفوت والعادلي دا يتذل
لابد تتنحوا ودا هــو اخـر حـل من يوم ما شوفناكوا شوفنا الخراب بيهل
فوت أمري إليه رب العباد والكل ينصرنا سبحانه المولى عز وجل
كلمات الشاعر : أحمد الحجاوي
ساحة النقاش