بحبك يا أمي
أمي ياروحي يا غالية عليا .... يا أجمل كلمة شافتها عينيا
قلبي اختارك تبقي حبيبته ..... لأنك ست الكل وسته
عشت في حضنك ياما سنين ..... وعمري ما كنت معاكي حزين
ده انتي يا امي حكاية جميلة ... ونجمة جميلة في أجمل ليلة
تعبتي ياما وشوفتي أسية ... وياما بكيتي وخفتي عليا
ده انتي نعمة من ربنا ليا .... وحالف لصونها وأشيلها في عينيا
عشتي سنين وسنين وسطينا ... وكنتي الحضن الدافي علينا
ده يوم فرحي بتبقي معايا ... ويوم جرحي بتكوني دوايا
وحبك ساكن دايما جوايا ..... وقلبك قمر بينور سمايا
هفضل طول العمر حبيبك ... وعمري يا امي في يوم ما هسيبك
وقلبي يا امي هيفضل شايلك ..... وعمري ما هقدر أرد جمايلك
يا أول كلمة نطقها لساني ... وأجمل غنوة في أحلى أغاني
ده أنتي يا أمي هدية جميلة ...... وأنتي الصحبة وكل العيلة
ده قلبي في حبك ياما اتكلم .... وفي بعده عنك ياما أتئلم
وأنتي الصاحب وأنتي الحبيب ... وقلبك دايما من قلبي قريب
ده لو مسمعتش صوتك يوم .... قلبي يعيش في نار وهموم
ده حبك يا امي بيجري في دمي .... وياما بكيتي وشلتي همي
وياما يا غالية في حضنك خدتيني ... وكنتي بقلبــك بتضميني
غلط في حقك ياما كتير..... ... لكن قلبــك قلـب كبير
وشوفتي مني عذاب وأسية .... وما شوفتش منك غير الحنية
لو يوم يا أمي فارقتك ليلة .... بحس اني من غير عيلة
في الغربة صورتك جوة خيالي .... بسهر أفكر فيكي ليالي
ولو يوم يا أمي تعبت شوية .... قلبك بيصحى يفكر فيا
ومهما يا أمي حكينا عليكي .... عمر الكلام ما هيوصف فيكي
ده أنتي يا أمي أطيب قلب.. ... وأجل كلمة في سطر الحب
<!--[if !supportLineBreakNewLine]-->
مش هقول ان القصيدة دي من تأليفي لأنها مش تأليف ده كلام حقيقي وبجد طالع من قلبي ورايح لقلبك يا أمي مش بس في يوم عيد الأم في كل لحظة في حياتي هفضل أحبك يا أمي وكل يوم بيعدي وانتي راضية عني هو ده عيدي وعيدك يا أمي
أحمد الحجاوي
ساحة النقاش