ورق ورق ورق ورق

الدولة دي دولة ورق

و الناس كمان حفنة ورق

وزراء ورق و رجال ورق

نختار محافظ واد همام

يطلع اخف من الورق

و نجيب وزيرعاقل كريم

يطلع مفيش و رجل هُزُؤ

و ننادي يمكن يسمعوا

لحد صوتنا ما اتخنق

لحد ما وطنا صرخ

لأ لأ وطنا يا ناس غرق

و الصف ما بينا افترق

و نقول دا يمكن يتصلح

يرد سيدنا بدون ضمير

الوقت ضيق ما لحق

و كلامي ده مش للجميع

للي اختلس و اللي ظلم

و اللي نهب و اللي سرق

شكوتنا يا سيادة الوزير

صرخة ضعيف للي خلق

دعوة رجل حر انظلم

طوق رقبته يا قوي

و في نار جهنم يحترق

يومها الحكم غير مرتشي

و لا النظام كان مخترق

فيها العدالة ناجزة

و القاضي فيها من رزق

و كمان شهودك صادقين

ايدك و رجلك و اللسان

و الجلد وياهم نطق

تقول و هم دول بيتكلموا

ارد بعقيدة و يقين

نطقوا بامر من خلق

الشاعر المصري

محـــمد العـــراقي

10 / 9 / 2015 م