جارى التحميل
استخدم زر ESC أو رجوع للعودة
قصيدة " أحلام الصغار "
شعر عامى
للشاعر والأديب رمضان عزوز
واحنا صغار
فى الحارة أو فى المدرسة
كان حلمنا
نكبر اوام
نبقى كبار
كان حلمنا
أكبر كتير
من عمرنا
من سننا
فاتت سنين
وكبرنا لكن حلمنا
تاه مننا
ضاع مننا
قالوا زمان
دى ارضكم
وخيرها ليكم كلكم
شايفين قصور
سكناها اشباح البشر
واحنا اللى عايشين
فى القبور
وسط الحجارة والصخور
والبرد ينخر عضمنا
سامع صراخ
قلبى بيصرخ
م الألم
الحلم جوانا انهزم
الحلم جوانا انكسر
حتى الأمل
مات واندفن
ياريت فضلنا صغيرين
ياريت فضلنا صغيرين
من ديوان " عابر سبيل "
