** التلفزيون **
يا للي عاوز تكتشف كل اللي في الدنيا قريب أو بعيد
تعرف الأخبار تتابع اللّي حاصل و الجديد
أفتح الشاشة الصغيرة
و ادخل الدنيا الكبيرة
ركب الجناحين و طير زي اليمام
شوف بلاد و لا كنت تحلم يوم تشوفها في المنام
الثقافة و السياسة و البرامج و المسلسل
و اللي بيعلم طبيخ
و اللي دايس في الصريخ
و اللي في الإعلان يروج للهوا بطريقة أسهل
لو في يوم عاوز تفرفش تلقي فيه نكتة و كوميديا
أو تحب تشوف حكاية أو رواية و تراجيديا
و الأغاني اللي بتطرب
و الموسيقي اللي بتعجب
و المشاهد الحزينة و دم سايح
و التجارة بالفضايح
و السياسة و الخبر
اللي جاهد و اللي عاهد و اللي مات و اللي انتحر
كل يوم تفتح تلاقي شيئ جديد بيخلي عقلك ينبهر
حتي للأطفال مسلّي
أفتح الكارتون و علّي
تلقي ضحكة باينة في عيون الصغار
فرحانين شايفين رسوم متحركة يتبعوها بانبهار
و في مواسم المدارس فيه برامج تعليمية
و العبادة و الرياضة عالهوا منقولة حية
و المظاهرة في الطريق
و الجرايم و الحريق
و الخداع و حكاية ليها ميت هدف
ناس موافقة بعضها و ناس مزاجها تختلف
و الفجور
و الإباحية اللّي لازم تجتنبها بألف سور
و الفرنسي و الانجليزي
بس خدها نصيحة منّي يا عزيزي
هو تلفزيون صغير
نعمة غالية و برضه نقمة و بإيديك يبني يدمّر
خلّي منه أحلي شاشة
أحسن الرؤيا و ركّز في اختيارك تبقى باشا
** همسات رمضانية **
** محمود بيومي **