..............*** اسكندريه ***..............
-----------------------------------------------
يا اسكندريّه جمالك .. كل يوم بيزيد
فى كل يوم حاجه حلوه.. تطوير مع تجديد
عالبحر حاجه تفرّح.. كل اللى شافها سعيد
اللى على الشط قاعد.. وللى ماشى بعيد
يشمّ نسمة هوا... تزيح الهموم دا أكيد
عالكوبرى فى استانلى.. قعده تنسى فيها نفسك
وتبصّ عالبحر.. تشكى له .. اللى فى نفسك
الموج يطبطب عليك.. ويحضن الشكوى
ويمشى بيها بعيد...من خوفه على نفسك
والموجه دايما صديقه .. مخلصه جدا
سرّك معاها فى بير ..كأنّك تحكى مع نفسك
والقعده عالبحر.. ييجى ف جوّها الإلهام
الفكره مع موهبه... تكتب أغانى غرام
واليوم أنا و أصدقائى .. سعدنا بزياره
رجعنا تانى شباب .. كما كنّا فى الحاره
ضحكنا يامه قوى .. و أكلنا أشهى طعام
مفيهش لحمه صحيح .. لكن كأنّه حمام
فى بحرنا وشطّنا هاجت الذكرى
وردت على خاطرى .. ألف ومتين فكره
بسرعه طارت الفكر.. خدها نسيم البحر
مهو بحرنا مش طبيعى ..موجه مليان سحر
اسكندريه دى جنّه... جمالها ما يوصفش
اللى ما زار بحرها ..يبقى كأنّه ما عشّ .
 ( رفعت فايد )