في ناس قالت كفايه عايزين استقرار لما مبارك قال مش هاترشح وقالو كفايه عايزين استقرار لما قال هافوض عمر سليمان وقالو كفايه عايزين استقرار لما كنا عايزين نقيل شفيق .... واثبتت الايام ان كفايه التي تعني الاستقرار هي خطأ علي طول الخط وان التظاهرات ذات المطالب الشعبية وليست الفئوية صح علي طول الخط ...فالثورة تعاني من جرائم فلول النظام ومبارك ليس في الحكم فمابالك لو كنا كفيناها زي ماقالو عشان الاستقرار كان عمو مبارك عمل فينا ايه !!. وبالنسبة لشفيق اثبت شرف انه احسن ميت مره منه بغض النظر عن مميزات وعيوب شفيق يعني فكرة كفاية ككل اثبتت خطأها...ويا رب اللي قال كفايه قبل كده يقتنع وينحاز للحق ولمصلحة مصر.

فرق  كبير بين الاستقرار والسلبية...الاستقرار مطلب يتفق عليه الكل الي مكميلين مظاهرات والي مش بيتظاهرو...اما الاستحمارهو الاستمرار في ترديد كلمه وكل الي بتعمله يؤدي لغيرها او لعكسها. الاستقرار متوقف علي مطالب شعبيه ميختلفش عليها اتنين لو متحققتش الناس مش هاتبطل تتظاهر وتعتصم  ومش هيحصل الاستقرار الي كلنا عايزينه... اما السلبية هي الجمود والتشبث بفكرة خطأ زرعتها الثورة المضدادة ان الاستقرار يعني انك تفضل مبلط سلبي ومتتحركش ابدا مع ان الاستقرار ممكن يكون في انك تنزل تعترض عشان التغير يحصل ونخلص بقي وترجع الميه لمجاريها فيحصل الاستقرار الحقيقي الي كلنا عايزينه.

 
الاستقرار اننا كلنا نجتمع علي بناء اساس الدولة...الاساس الي يستحمل ويفضل مستقر لعقود وازمنه زي اوربا كده...ولو كان بناء الاساسات دي يعني التظاهر مع بتوع ماسبيرو لان التخلص من فاسدين الاعلام ده جزء من الاساس الي هايعمل استقرار يبقي اشترك مع ماسبيرو ولوكان بناء اساس الاستقرارمعناه اني اشارك طلبة كلية ولو بقلبي في مظاهراتهم عشان يشيلو عميد كليه عضو لجنة سياسات متعين بالواسطة يبقي لازم ادعمهم لان الجامعات جزء من اساس الاستقرار. اكيد دورك في الاستقرار مش انك تكون متفرج...اكيد دورك في الاستقرار انك تفكر ازاي يكون فيه استقرار دائم مش استقرار يومين وبعديه انفجار.... في النهاية مش عيب انك تحب الاستقرار بالعكس ده شئ رائع بس العيب انك تكون سلبي