يافتنه عن مصر غورى
أنا ضد ظلمك ثرتْ
أنا قلت عديت بحورى
يابلادى واتحررتْ
أتارينى سقطِتْ جسورى
ووقعت واتعورتْ
جرحى ياريتك ياحلوه
تداوينى وتطببينى
وجراحى ترخى عليها
ضلك وتمحى أنينى
ياحبيبتى خايف عليكى
من بكره بَعدى يهينوكى
وانتى ضيا نن عينى
ياضناىَ ويضيعوكى
فى العتمه مستنيينك
يلطخوا لك جبينك
وانتى اللى من نور بهاكى
الشمس تخجل تقابلكْ
ولا حد بعدك وقبلك
دا انت يا مصر الحكايه
من قبل كل بدايه
عاوزين يخبوا نهارك
ويخربوا لك ديارك
مالهم ومال الكنايس ؟
مالهم ومال الجوامع ؟
نازلين فى أرضك دسايس
والرب شاهد وسامع
على جرايم السفاله
والخسَّه ويا النداله
والقلب حزنان عليكى
ياحبيبتى وانتى الضحيه
مهما أصابوا ورموكى
بسهام سمومهم عفيَّه
ح تقومى يامصر قومَه
تخزى العيون الرديه
والثوره لسَّاها جيَّهْ
ح تقلَّع السِّيسبان
وتبيد لكل الديدان
ويا العفَفَش والفيران
جوه الجحور الخفيه
مهما يزايدوا عليكى
إنتى الشديده القويه
وانا رغم حزنى وأسايا
على دمِّ كل الضحايا
أبناء يسوع ومحمدْ
الكل عابد لربه
والكل محتاج لقربه
والرب واحد ممجد
أضعف إيمان هوه شعرى
مااملكش غيره وحبى
ومصر فى الدم تسرى
وهيه روحى وقلبى
ياللا نصالح نفوسنا
ونكمل المشوار
ونعلى فى الشمس روسنا
ونكون صحيح ثوار
وإيدينا مع بعض نعلا
ونحارب الأشرار
علشان شهيدنا يسامحنا
يالاَّ نداوى جروحنا
ونقول حقيقى احنا أولىّ
فى الكون نكون أحرار
فجر الأحد 8 مايو2011
ساحة النقاش