باعدك تحت من عينى
بكورس جمال
وانمنم بعض تفاصيلك
وباختم لك
باختم داوود
ف ساعة البوحة والترحال
واخلى الثغر كالزهرة
تفوح أزجال
واعلم قلبك الساهى
ضمير الحب
والموال
وهاشعل نرجس الآهة
بنار نسمة
تمر وصال
باعدك حلم بتحقق
بلا تآوييل
تطير ف الريح كأغنية
تسبِّل فيها أجفانك
وألحانك
كسرب ذهول
باعدك نرد بوزيره
مفيش غيره
يهد الفيل
وهانتخبك اذا قررت
تدخلنى
ببسمة شوق
وعمرة وحجة
روح هايمة
كنجم أصيل
ولما تشرَّع المنهج
بلاش تنهج
ونام ف عيونى واتهجَّى
حروف كورسِى
وجرَّب تضرب العِشرة
ف كام نظرة
وكام شطرة
أنا عديت حبيب روحى
كما مرايا
اشوف فيها ضيا نفسى
ولما يفيض هوى همسى
واناجى العشق ف حروفك
هاكون طيفك
تكون طيفى
وابص كتير على الشجرة
حمام زاجل
بقول عاجل
بانك صرت ف شغافى
بقى وليفى
