الحقيقة العارية

أسطورة الحقيقة والكذب اللي انتشرت في القرن ال١٩
وتقول الأسطورة ان الكذب والحقيقة اتقابلوا في يوم
فقال الكذب للحقيقة :
_انهاردة يوم جميل جدا!
الحقيقة بصت حواليها في شك ورفعت عينيها للسما لقت اليوم فعلا حلو والجو جميل وقررت تقضي اليوم بتتمشى مع الكذب
ورجع قال الكذب للحقيقة :
– المية فى البير حلوة قوي ، تعالي ننزل نستحمى فيها..
بصت الحقيقة للكذب فى شك للمرة الثانية، ولمست الماية، لقيتها حلوة فعلا..
فخلع الاثنين هدومهم ، ونزلوا يستحموا فى البير.
وفجأة، خرج الكذب من البير، ولبس بسرعة هدوم الحقيقة وجري
خرجت الحقيقة من البير عريانة وغضبانة بتجري ورا الكذب عايزة تلحقه
ولما الناس شفوها عريانة اتضايقوا منها ودوروا وشهم..
أما الحقيقة المسكينة،
فرجعت للبير واستخبت فيه ومطلعتش تانى من كتر خجلها
ومن ساعتها الكذب بيلف العالم لابس توب الحقيقة والناس بتقبله ، وفي نفس الوقت بيرفضوا يشوفوا الحقيقة عريانة!.