جارى التحميل
استخدم زر ESC أو رجوع للعودة
يا معلمين مصر : مصر احـنا اللى بانيينها
وناسـها هُمَّـا حصـايد غرسـنا ف طينها
لو طابت الزَّرْعَة أو خـابت لا ســمح الله
فمع الأسـف فى الحالين احنا اللى زارعينها !
****
احنا اللى طـول الزمـن بنربـى ونعـلم
ونبان فى غاية السرور واحنا بنتـألم
لا نبتغى من عطاءنا إلا وجـه الله
وبنبقى ســاكتين وأعمالنا بتتكـلم !
****
احنا اللى قال فينا ( شـوقى) إننا ( كدنا )
لكن جحود بعض تلامــيذنا منكـدنا
مع إننا غيـر كـدا ويَّا اللى علِّمـنا
حـرفاً ، بقيـنا عبيـده ، وهو سيِّدْنَا !
****
احنا ومن قبلنا أجيال كتيـر غيرنا
روينا ياما عطاشى العلم من بـيرنا
قلوبنا تشـبه جيوبنا وزيها إيدينـا
هما التـلاتة ف بياضهم زى طباشيرنا !!
****
علِّمنا ناس منـهم المغمـور والمشهور
والدغرى والقرعجى والفقـرى والميسور
كبروا على ايدينا لكن شفنا معظمهم
كبرت علينا نفوسـهم لما عاشـوا الدور !
****
لكن وحـيث إنها رسالة ومش مهنة
ومفيش فى كـل الوظايف حد يشبهنا
فمن واجبنا نعلـِّم نشـئنا بضمير
من غير ما حد يحـاسبنا أو ينبهنا !
****
وطبيعى مش كل من علِّم أجاد وأفاد
وعلاقته فوق مستوى الشبهات مع الأولاد
فيه ناس كدا , وبرضه فيه ناس غير كدا ودا شىء
وارد مع زيادة فى الأعداد وسوء إعداد !
***
مِنَّا اللى صاين كرامته وراضى بالملاليم
ومنِّنا اللى أساء لرسالة التعليم
وجعل (مِعلم) بكسر المـيم يتبــاهى
إنه اشترى بالفلوس واحد بضم الميم !!
****
ولسه كلمة هقـولها ورزقى ع المولى
لكافة المسـئولين على مســتوى الدولة
مش كلـنا ( درسجية ) دول أقلـية
من أغلبية غلابة لا قوة ولا حول !
****
لولا البقية اللى باقية من إعارته زمان
أو شغْلة بعد الدراسة فى ورشة أو دكان
أو ريع قيراط أرض هو ميراثه من أهله
لكُنّا شفنا المُــــعَلِّم يطلـب الإحسـان !!
****
بالعلم نبنى الوطن ونعيش حياة آمنة
ويزيد فى ركب الحضارة حجم أســهامنا
مع حلول ألف تالتة اسـتقبلوها الناس
إلا احنا فى مصـر هلّت ألفنا التامنة !!
****
والعـلم - ودا شىء مؤكد - احنا حُرَّاسُـه
لو ينصـفونا هنفضل عِـــزوته وناســه
لو يعمــلوا غير كــدا هنربى ونعَلِّم
بس بمشاعر أصيل مجروح فى إحساسه !!
يناير 2000 م
