جارى التحميل
استخدم زر ESC أو رجوع للعودة
تلاتين سنة هاصوا فيها وشيّلونا الهَمّ
ولعبوا بالمليارات واحنا طرشنا الدم
بذُلّنا اتسلوا بس أخيرا اتذلوا
وف جمهورية ( طرة ) شمل الفساد اتلم !
****
تلاتين سنة عنجهية وبلطجة وتزييف
لكل شىء حتى أساميهم : سرور وشريف
وأمين وعادلى ورشيد وجمال وغالى وعز
والمستفز ان شيخ منصرهم اسمه نظيف !
****
تلاتين سنة برلمانات كلها تزوير
فيها المعارضة ديكور تافه بدون تأثير
وعشان كدا الشعب ساب ( سيد قراره ) وراح
للبرلمان صاحب الشرعية فى التحرير !
****
تلاتين سنة وغيرنا ناس ( متطوّرين ) واحنا
بس اللى ( متطورئين ) وعشان كدا فرحنا
بوصول رموز الفساد للمزرعة وياريت
يقولوا للى ماجاش : قرّب هنا ف ريحنا !
****
تلاتين سنة والمماليك ( المُباركيّة )
بيعاهدوا فرعون بعقد العزم والنيّة
على مصّ دم الغلابة ، ووفّوا بوعودهم
خلوا اللى عايش مريض وان مات بدون ديّة !
****
تلاتين سنة وكل شىء فى مصر صار أسوا
بفعل فاعل خسيس وبمنتهى القسوة
مع إن كل اللى كانوا أمرنا ف إيدهم
- لا مؤاخذة – أكبر ما فيهم كلب ولا يسوى !
****
تلاتين سنة واللى بيشرّع لنا طبال
بيساعده قوّاد وبياع بانجو أو محتال
أما الحكومة الذكية فللأسف كانت
على غير مسمى ، ودا أبسط كلام ينقال !
****
تلاتين سنة ذُل فيها الأمن كان طايح
فى الشعب ، لا قانون ولا دستور ولا لوايح
وياما دخل السجون ناس أبرياء وأكيد
لسه الجراب فيه بلاوى كتيرة وفضايح !
****
تلاتين سنة وحزب وثنى بيعبد الفرعون
رافع شعارات بدون معنى ولا مضمون
وهدفه تكريس ودعم ثقافة التوريث
وكأنه قرداتى واحنا كلنا ميمون !
****
تلاتين سنة بين علاج على نفقة الدولة
منهوب ، وتعليم منيّل ، قِلّته أولى
وصحافة بتنافق الحاكم ، وتليفزيون
أفضل كتير منه نلعب عشرتين طاولة !
****
تلاتين سنة فيلم هندى طويل قوى ومُملّ
واللى ننام فيه نقوم فيه ، بس لما الغِلّ
جوانا زاد قُلنا ياللا ما بدهاش ، والفيس
بوك ابتدت شمس حريتنا منه تهلّ !
****
تلاتين سنة بعد نصر فى حرب مصيرية
رئيس أنانى اختزلها ف ضربة جوية
واتجاهل المخلصين اللى لهم أدوار
عظيمة لكن – بسوء النية – منسيّة !
****
كان مُبتداها ( افتِرا ) الفرعون فى شرم الشيخ
ومُنتهاها ( ف طرة ) ، سجّل بقى يا تاريخ
إن احنا بعد المحاكمة ما تنتهى عايزين
يريحونا ويبنوا سجن فى المريخ !
فبراير 2011 م
