جارى التحميل
استخدم زر ESC أو رجوع للعودة
أنا باحترم كرسى الحلاق
أصله استثناء
من قاعدة بعد ما كانت داء
قلبت بوباء !
****
خلاصتها إن ابن اللى عليه
هو اللى يليه
ويستمر و(من غير ليه)
زحف الأبناء !
****
أى ابن صاحب دال مشهور
يصبح دكتور
وابن اللى من غير دال مقهور
مهزوم مُستاء !
****
وابن اللى على كتفه الدبابير
وعليكم خير
بكرة تلاقون له شأن كبير
جوه الُقشلاق !
****
وابن السفير من غير هندام
ولا كتر علام
مولود بدرجة قنصل عام
دولة واء واء !
****
وابن المدير من غير تبرير
هب بقى مدير
لا كفاءة ولا خبرة ولاضمير
ولا حسن أداء !
****
وابن الوزير ربنا يحميه
ويبارك فيه
وزير وبكره ولاد معاليه
يصبحوا وزراء !
****
وابن الرياضى حبايب ابوه
بكره يخلوه
نجم النجوم وزمايله تتوه
فى حوارى بولاق !
**
وفى الفنون ابن الفنان
أيا من كان
محجوز مكانه هو كمان
تحت الأضواء !
****
أما ابن أى رئيس تحرير
أو صحفى كبير
فأكيد ومن بره الطوابير
جاى للقراء !
****
وابن المذيع بطريق مشروع
أو غير مشروع
مشروع مذيع مرئى ومسموع
أرضى وفضاء !
****
والجامعة فيها ابن الأستاذ
يصبح لو عاز
أستاذ ولو يتحرقوا بجاز
باقى الزملاء !
****
وابن اللى فيه اللى مكفيه
بتزيد مآسيه
ولا لاقى حد يحن عليه
بين الأحياء
****
لا نفع معاه قرض الصندوق
ولا دعم (شروق)
ولا اللى تحت بيطلع فوق
حتى ولو فاق
****
واقع لا فيه منطق معقول
ولا شىء مقبول
وان قلت ليه تلقى المسئول
قال باستهزاء !
****
اشمعنى يعنى ابن الجزار
وابن النجار
وابن الغفير وابن الحمار
وابن السواق ؟!
****
ليه اللى وارث مهنة ابوه
منهم تسيبوه
فى حاله وخلافه تحاسبوه
وكأنه أساء ؟!
****
والرد ببساطة وبشويش
إن الحرافيش
دول اللى مش لاقيين العيش
غير الأمراء !
****
فيه كرسى بيخلّى اللى عليه
باشا أوبيه
وكرسى مش شايلاه رجليه
زى البؤساء !
****
لكن بقى الكرسى المذكور
محجوز بالدور
ولا يعرف الغش ولا الزور
ولا الاستثناء !
****
وغير كدا حواليه مرايات
فاضحة النيَّات
وكاشفة كافة الاتجاهات
بلا أى زواق !
****
وعشان كدا أنا شايف فيه
سر يخليه
غير عادى وواجبنا نحييه
كرسى الحلاق !!
2009 م
