جارى التحميل
استخدم زر ESC أو رجوع للعودة
بقى كدا معقول من غير ما تقول
ترفع سعرك فى البورصة يا فول
ليه هُنت عليك دا انا قايل فيك
شعر ملا الدنيا عرض وطول !
****
عمرى ما حسيت ان احنا اتنين
وكأننا روح واحدة ف جسدين
ولا عندى لغيرك شوق وحنين
ولا عنك كنت فى يوم مشغول !
****
أنا وانت بتحكينا الحواديت
زى حكاية روميو وجولييت
ويّاك باشعر إن البيت بيت
وبعيد عنك بالقاه مقفول !
****
يكفيك إن مافيش ولا فيروس
قرّب منك خفى أو ملموس
أما ان كان على توأمك السوس
فدا كائن طيب وابن أصول !
****
لو شفناه بنشيله ونرميه
لا بيئذينا ولا احنا بنئذيه
والسر طبيعى فى خوفنا عليه
إن ما بينّا وبينه بروتوكول !
****
فكر فى مصيرنا يا فول أرجوك
ها نموت م الجوع لما يغلوك
وها تفقد أكتر ناس حبوك
وها تبقى انت ساعتها المسئول !
فبراير 2014 م
