جارى التحميل
استخدم زر ESC أو رجوع للعودة
<!--<!--
![]()
يامنشيِّين ياقاتكم
مانتوش فاكرين لاءاتكم
يتاعة لا تفاوض
ولا صلح ولا اعتراف ؟!
****
والاّ الخوف ع الكراسى
نسَّاكم المآسى
وخَلَّى القلب قاسى
مبدأ سلم اللى خاف ؟!
****
والاّ أوامر جيوشكم
اللى بيديها (بوشكم)
قدرت تجعل وشوشكم
صورة لأسوأ غلاف !
****
يا معطرين غُتركم
وناسيين أخد تاركم
كُتر كلامكم ستركم
وفضحكم الاختلاف !
****
أقوالكم غير فِعالكم
وشاغلكم جمع مالكم
وادى خيبة أملكم
باينة لكل اللى شاف !
****
أحوالكم غير مريحة
وفلسطينكم دبيحة
وباقولها لكم صريحة
كل سنينكم عجاف !
****
يا محبِّكين عقالكم
طوِّل زمن احتلالكم
حاولوا تداووا عِللكم
قبل نهاية المطاف !
****
إزاى عايشين في راحة
ودياركم مستباحة
يا مهازيم كل ساحة
ناموا وشِدّوا اللحاف !!
مايو 2002 م
