جارى التحميل
استخدم زر ESC أو رجوع للعودة
<!--<!--
![]()
معقول خمسين سنه فاتت يااااااااااه !
علي طول الحلم اللي حلمناه
واللى صحينا علشان نلقــــاه
لساه حلم الملايين !
****
وكأن الخمسين سنـة مافاتوش
أو إن تاريخنا تاريخ مغشوش
أو إن الصورة ناقصها رتوش
أو إننا مش فاهمين !
****
فبرغم مرور الخمسين عام
لسه كتير م الأحلام أحــلام
وكتير منـها لقينـاه أوهــام
فى سنة ألفين واتنين !
****
حلم الجماهير العربية
فى الحرية والاشتراكية
وسيادة روح الشرعية
فى مختلف الميادين !
****
حلم التعليم المجانى
والطب الراقى الإنسانى
وولى الأمر الحقانى
المتمسك بالدين !
****
حلم الشورى ف أخد القرارات
وحياد ونزاهة الانتخابات
والشفافية وإنكار الذات
عند البرلمانيين !
****
لسه بيان الثورة المشهور
فاتح في العتمة طاقة نور
والكل بفكر جمال مبهور
من أنصار ومعارضين !
****
صدى صوته ساكن فى ودانا
معانيه محفورة في وجدانا
هو الفارس وسط ميدانا
واحنا جنود ملتزمين !
****
لسه أغانى الثورة بتنقال
فرسانها ( حليم وجاهين وكمال )
لكن فيه غنوة طارحة سؤال
محرج للمستمعين !
****
( جبل الجرانيت انشق انشال )
( وف بحر النيل انزق امال )
( ما فى حاجة تقول لنا لأ ايشحال )
( يوم تحريرنا فلسطين ) !
****
وان كان جبل الجرانيت انشق
والسد خلا ص بقي عالي بحق
فيه لسه حاجات بتقول لنا لأ
زى الإسرائيليين !!
****
طايحين في ديارنا عرض و طول
ومفيش ولا حاكم ولا مسئول
بيقدم شئ غير انه يقول
وكتير منهم صامتين !
****
كانت أغانينا الوطنية
بتقدم صورة وردية
والعصابات الإسرائيلية
صابرة علينا إلي حين !
****
فلا رميناهم في البحر زمان
ولا هما اتهدوا لحد الآن
أكتر من كدا زاد العدوان
على أهالينا الصامدين !
****
أهالينا الصامدين تحت حصار
ومدابح وحشية ودمار
ومفيش فى ايديهم غير أحجار
لكن مش متخاذلين !
****
لسه فلسطين أرض الرسالات
السماوية بتصحى وبتبات
ودموعها على الخد وهيهات
تلقى ف أزمتها معين !
****
بنفتش فى طريق آخره سراب
عن ( وحدة ما يغلبها غلاب )
أتارينا كبرنا وشعرنا شاب
ومازال الحلم جنين !
****
الوطن العربي ما زال محتل
وميزان العدل مازال مختل
وبيتهيألى ان مفيش حل
غير على ابد ناس تانيين !
****
ناس عارفة واجبها وحقوقها
والعزة بتجرى فى عروقها
ناس قادرة تحاسب محقوقها
مش ناس زينا نايمين !!
يوليو 2002 م
