ف اول السرداب
حلقات
مشبوكة ف تفاصيل القصة
مقفولة دواير الستنتاج
على فين
راح توصل بيك الحلقة
ف عنيك مشوار
مجهوله الخطوة اللى هتمشية وياك
ولان معاك
كام حلم لبنت راسمها خيالك
متعلق حلمك بالشقلوب
على كرسى الموت
مش عارف غالب او مغلوب
هيقولوا عليك
انسان اتوضى بنور الشمس
وغسلوا الدمع من الأخطاء
انسان لا اتعلم قلبوا الهمس
ولا شبكت ليله شفايفوا
الحاء بالباء
وابتدت الحلقه التانيه تبان
ويبان وياها الخوف جواك
معركتك خايف تدخل فيها
بينوبك واحد حاسس المك
مكتفيه عينك بالرعب تعيشوه
واديك اليأس مكلبش فيها
وضميرك صلبوا الوهم عليه
دقاتك خايفه تكون مهزوم
ويصيب النايب عنك
ضعف الخبرة
الحلقه التالته
بتكمل تفاصيل القصة
الامل الباقى اتفرفط منك
واشتاقت روحك زرع جديد
محتاجة شقوق الوش
م الفاس تقليبه
تخطيطة جديدة
لروح الشاب التايه فيك
وقنايا توزع فيك حيويه
مع ذلك
بتعيد حساباتك كل دقيقة
مستني تجيلك هى عشان تخطفها
وف ايدها لجام الفرس الابيض