النهار له عيون
للشاعر مدحت عطية
كل ما النور
يتسحب يروح
فى حته
تضلم
كل ما الشمس
تمشى فوق مكان
يغيم
حتى الديك
صوته .. بينيم
بعد ما كانا
ننام
ندخل فى أمانها
زرعوا التوهه
وشالو الطيبة
من إنسانها
أشرار العالم
على ببانها
رسموا الخطوة
قبل مكانها
كان غطا
واحد بيغطينا
دلوقتى بحس
إن الغطا
معرينا
كنا نخاف
نتلم
نخش فى بعضينا
دلوقتى
الخوف
من بعضينا
الدنيا ضلمه
مُش باين
مين كان
معاكِ
ومين . . هيكون
حيرة
مش . . عارف
مين فينا
الصادق
ومين فينا
الدون
أحنا فى ليل
والليل . . أعمى
بس النهار له
عيون
لازم الصبح
يطلع
ويستخب الليل
فى الهيش
والنور لازم يعدى
من الأزاز
والشيش
حب الوطن
بيدى . . حياة
وإل مستنى نهارك
يا بلادى ما بينتهيش
وهيعيش
والحسرة وافقة مستنية
ال نفسه نهارك
ما يجيش
مش دى يا بلادى
ملامحك
متاخده منينا
ومن نفسك
مش ده ليلك
مش ده فجرك
وحشانى يا بلادى
وأنا فى حجرك
وحشنى صوت
الحياة فى صدرك
النهار هيطلع
وهيبان
مين إل صان
ومين إل خان
مين إل أكل
من جوعك
ومين إل عشانك
بات جعان
هيبان إل خاف
وإل كان
جبان
مين إل غاب
ومين إل بان
مين إل قام
وقت . . الأذان
