تعليم مجانى
للشاعر مدحت عطية
المجانى
كان كله تعب
كله شقى
غيره مات
وهو .. بقى
غيره مارواش
فى الوقت
إلـ هو .. سقى
تعليم مجانى
يعنى على إلايد
والـ على الإيد
بيعيش عمره
حديد
علمنى أكون
وأنت ساكته
لسانك
إلـ يقول عنك
ويعيد
إتعلمت أكون
فيكى .. عنيد
المجان
زرع الغالى
نبت .. فيا
قيم وإيمان
عشت بيهم
وعاشوا حواليا
المجانى
له عليا
له فى القلم
إلـ مسكاه
إيديا
إتعلمت أشوف
بعين غيرى
وأنا بحسب
ولو لا قيت رقم
مش بتاعى
أشطب
إتعلمت الصدق
لو هكتب
وأرمى القلم
لو هكدب
علمنى أخد
قرار
أبص قدام
علمنى أقرا
إلـ بين .. الكلام
علمنى إن حب
الدنيا لجام
وإن العمر
مهما طال
أيام
علمنى
أثور .. أقوم
أقول لا
علمنى أكون
ثابت على
مبدأ
علمنى فى حياتى
أكون الألفة
ما أنجحش
بالزق
إتعلمت أقف
فى ضهرى
حيط
مش سوس
وراه .. نخر
تعليم مجانى
بكل فخر
بس وسط
البحر .. صخر
علامى علمنى
أكون
تحتيكى .. وجنبك
علمنى أكون
سلاح .. فى جنبك
علمنى يابلادى
إزاى أحبك
وأحب إلـ يحبك
إزاى أكره
عشانك
وأدوس برجلى
إلـ يسبك
التعليم المجانى
علمنى
لو مات الحلم
إزاى .. أرجعه
ولوتاه
إزاى بإيدى
أجمعه
إتعلمت إن
لبلادى
علم .. هرفعه
وإن حب الوطن
له تمن
وهدفعه
