إيه رأيكم نبعد عن البنطلونات والتى شيرتات واى حاجة متاخدة من لبس الولاد و نبص بقى للحاجات بتاعتنا احنا زى الجيبات و الفساتين . صحيح البنطلونات والتى شيرتات بتبقى عملية و مريحة فى أوقات كتير بس برضه لما تلبسى جيبة واسعة ولا فستان بفيونكة بيدوكى إحساس مختلف كأنك واحدة من أميرات القصص – تقدروا تتخيلوا سندريلا لابسة بنطلون باجى ولا تى شيرت ؟ – و بتبقى ماشية حاسة نفسك بنوتة كدة.

على فكرة الستايل دة ممكن يبقى عملى برضه و مايقيدش حركتك لأنه غالبا بيبقى واسع و مريح . غير كده بقى الجيبات و الفساتين فى منها موديلات و تصميمات كتيرة أوى و اذا اخترتى منها المناسب لشكل جسمك بتساعدك على الظهور فى احسن صورة.

الجيبات :

فى بنات كتير بتقول انا مش بليق فى الجيبات،  بس فعلا مافيش حاجة اسمها كدة , الاساس هنا هو اختيار الموديل اللى يناسبك . فمثلا الجسم النحيف تليق عليه الجيبات الواسعة اللى فيها قصات بالعرض – أدوار – و الجيبات اللى فيها طبقات و كرانيش و درابيه، لأن الموديلات دى بتدى حجم و مبتظهرش النحافة .

الأجسام الممتلئة بقى بتليق عليها الجيبات الطويلة المتوسطة فى وسعها و خاصة اللى فيها قصات أو تقليمات بالطول

الفساتين: مافيش بنت مابتليقش فى الفساتين لأن فكرة الفستان معمولة أصلا للبنت و عشان تليق على جسمها . طبعا تصميمات و أشكال الفساتين المختلفة ماتتعدش و لازم هتلاقى فيها المناسب ليكى .

الفستان بيقوم بنفس دور الجيبة و موديل الجيبة اللى هتليق عليكى هو نفسه موديل جيبونة الفستان المناسبة ليكى . أما الجزء الأعلى من الفستان فبرضه ليه موديلات مختلفة كتير تليق على أى جسم .

مثلا الأجسام النحيفة يناسبها الأمبير – قصة تحت الصدر- و الدرابيه و الكرانيش و الكشكشة لأان القماش المتنى فوق بعضه و المكشكش بيضيف كثافة و ميبينش النحافة

أما الفساتين السادة  – مافيهاش قصات – و الواسعة من عند الصدر فدى بتناسب الأجسام الممتلئة

متهيألى كدة مافيش حجة تمنعنا من لبس الفساتين و الجيبات و اننا يبقى شكلنا بناتى على الآخر.

malk2010

هـ**ـمـ**ــســ**ــات

ساحة النقاش

عدد زيارات الموقع

594,176