بنات كتير بتفكر إنها تلبس عبايات لكن بتمنعهم فكرة إن العبايات كلها سودة وموديل واحد و إن شكلهم فيها هايبقى مبهدل و مش شيك. الحقيقة بقى هى ان العبايات ممكن تكون من اشيك الحاجات اللى البنت هتلبسها بس بشرط إن موديل العباية يكون لايق عليها.. فكرة إن العبايات على طول بتكون سودة او غامقة و ان موديلاتها كلها شبه بعض دى فكرة غلط  و خاصة فى الفترة الأخيرة لأن مصممى الأزياء العرب و العالميين اهتموا جدا بتطوير العبايات و ابتكار موديلات جديدة منها علشان تناسب أحدث خطوط الموضة العالمية.. و بالتالى بقت العبايات موجودة بأشكال و موديلات كتير و تقريبا بكل الالوان.

علشان نصحح الفكرة دى النهاردة هانتكلم عن الأنواع و الأشكال المختلفة للعبايات اللى ممكن تختارى منها المناسب ليكى و اللى فى نفس الوقت بيحافظ على الهدف الرئيسى من العبايات و هو الإحتشام . أنواع و أشكال العبايات ممكن تتقسم على أساس حاجتين أولهم البلد أو التراث اللى جى منه تصميم العباية والتانية هى المناسبة او المكان اللى هاتتلبس فيه.. المرة دى هانتكلم عن النقطة الأولى.

تصميمات العبايات بتختلف اختلاف كبير تبعا للتراث المستوحاة منه.. و ده بيخلى عندنا تنوع فى أشكال و موديلات العبايات فى العالم العربى لأنه غنى جدا بالحضارات اللى ليها تراث عظيم و متنوع. و لحسن الحظ ان الموديلات المختلفة دى بتنتقل من بلد للتانى بسهولة و بالتالى بتبقى الأشكال المختلفة متوافرة فى أسواق كل بلد و منهم مصر اللى موجود فيها تنوع كبير من تصميمات العبايات المختلفة و دة بيتيح لينا فرصة أكبر للاختيار.

العباية الخليجية

بتعتمد العباية الخليجية في الغالب على اللون الأسود و اللى بيعتبر اللون الأساسي ليها  و تصميمها غالبا بيكون بسيط. لكن فى السنوات الأخيرة تطورت تصميماتها بشكل كبير و ظهرت  بألوان تانية زى الاصفر والبرتقالي والتركواز و تنوعت الأقمشة المستخدمة فيها و شملت الحرير والشيفون والاورجانزا والقطن والكروشيه والساتان والكتان وحتى الجينز و كمان تنوعت أشكال تطريز العباية الخليجية ما بين نقوش من الخيوط و استخدام الترتر والخرز وقطع من الكريستال الشفاف و الملون، ده غير التطريز باستخدام قطع من الجلد ومن الشامواه والحرير.

الجلابية الكويتية

إنتشرت العباية أو الجلابية الكويتية مؤخرا فى العالم العربى و ده  بسبب تصميماتها المبتكرة اللي بتجمع بين أشكال مختلفة مستوحاة من دول الشرق الأقصى و بتمزج بين ألوان كتيرة غير الأسود

العباية أو القفطان المغربى

تشتهر العباية المغربية و اللى بنسميها أحيانا القفطان المغربى بألوانها الجذابة المشرقة واستخدام أنواع مختلفة من الاقمشة في صناعتها زى الساتان والشيفون والحرير والقطن مع تطريزها بزخارف تراثية بتتميز بالأصالة. اللى بيخلى العباية المغربية  مختلفة عن غيرها  كمان هو الذيل الطويل نسبيا مع وجود غطاء للرأس متخيط فى العباية نفسها و أحيانا بيبقى معاها بنطلون واسع كجزء من الزي و بيكون بنفس اللون أو بنفس التطريزات اللى فى العباية و ده علشان يديكى راحة اكبر لما تلبسيها

العباية الفلسطينية

العباية الفلسطينية ليها لونين أساسيين هما الأبيض والأسود و بتستخدم في صناعتها الاقمشة القطنية زى الكتان بالاضافة للمخمل – القطيفة – . و بيتميز تصميم العباية دى بالأكمام العريضة و الحزام الفلسطيني – بيسموه الجداد – المصنوع إما من الحرير أو من القطن المقلم و ده ممكن يتربط وسط العباية و يتعقد من قدام أو على الجانبين و ينزل يزين العباية. بيميز العباية الفلسطينية كمان أساليب تطريزها المختلفة, وأساليب التطريز دى بتختلف من منطقة لأخرى فى فلسطين. يعنى مثلا في شمال فلسطين وجنوبها  بيستخدموا الأسلوب البدوى المستوحى من البيئة الصحراوية و اللى أساسه الرسومات الهندسية زى النجمة الثمانية والمثلث والمعين و المربع، أما باقي المدن الفلسطينية فبينتشر فيها الأسلوب الريفي اللى بيعبر عن البيئة الزراعية زى رسومات النجوم والشجر والأزهار

العباية أو الجلابية المصرية

المصريين عرفوا الجلابية من زمان أوى و كانت بداية صناعة الجلابية المصرية فى حي خان الخليلي. و لفترة طويلة فضلت الجلابية المصرية معروفة بتصميم معين معتمد على الخطوط  المستقيمة و التطريز اللى ليه طابع عربي. واستعملت لصناعتها أقمشة متنوعة أهمها الكتان و«الترجال» والساتان المقلم. أما من حوالى عشر سنين بدأت عملية تطوير الجلابية المصرية بدخول العباية الخليجية و انتشارها فى مصر. لأن دخول العباية الخليجية كان بداية لدخول مختلف موديلات العبايات لمصر و الدمج بين الموديلات دى و بالتالى تنوعت تصميمات العبايات المصرية بألوان و أساليب تطريز مختلفة ما بين الجلابية المصرية و العبايات الخليجي والفلسطيني والمغربي