اعذرنى يا ابنى مكسوف منك ** وسامحنى لانى كنت جبان
كنت بشوف الباطل يرقص ** اغنى واعزف ليه الحان 
كان الحق يضيع قدامى ** مكنتش انطق حتى بيان
مكنتش ارفع ابدا صوتى ** كاتم همى وماشى زعلان 
كنت بقول الصبر كويس ** شايف موج الظلم طوفان 
عشت ذليل وكنت قنوع ** جوة بلادى ما لاقى مكان
شايف قوت ولادى منهوب ** وكروش مليانه زى حيتان 
كنت بشوف الحرمان فيكم ** وشايف بيتى كله جعان
كنت بخدر روحى وساكت ** اكل عيش واقول شبعان
كان الحلم معايا متكتف ** حتى الشمس ما راضيه تبان 
كنت ببرم شنبى وماشى ** وعامل فيها ابو الشجعان 
واقول حريه اساس الفوضى ** عبوديه احسن ويا امان
لكن يابنى صوتك جلجل ** وردك فتح فى الميدان
خليك راجل عيش بكرامه ** اياك تقبل يوم تتهان 
ارسم حلم المجد بايدك ** وبلدك اغزل ليها فستان
ارفع راسك عيش حريه ** صنعت بايدك احلى زمان 
اياك واحد يركب موجتك ** ويقولك اسمى ابو الفرسان
انت يابنى الاسد المارد ** رفضت تعيش ذل وخذلان
خلى ابنك بيك يتفاخر ** وسامحنى لانى كنت جبان