قصيده/متقولش

متقولش اسكن بعيونك عيونى الحزن ماليها

متقولش يوم اكون روحك دى روحى ملك لباريها

متقولش نفسى اكون قلبك انا قلبى جراحه دايب فيها

وازاى تكون لقلبى حبيب وعيونك العشق ماليها

لكل ست تمر تميل قلبك بيحرس خطاويها

وان نطقت كلمه بصوتها جميل تجرى وتدلع فيها

هو الغالى دايما رخيص والرخيصه بتغليها

انا مش طبعى انى اغير بس لى كرامه احميها

حقك تعيش زى العصافير مع كل زهره ف غناويها

وانا كمان من حقى اقول ايامى انا مش بلاقيها

و قلبى وروحى كمان غاليين محدش يفهم ايه فيها

عشان كده لو يوم تعشقنى لازم عنيك تتوب بيها

عن عشق ودوب كل الزهور وقلبى يكون جنه ارويها

بحبك تطرح احلى كلام واغرد غناوى تدوب فيها

ساعتها بس تكون لى حبيب ونعيش ايامنا نحليها

وان طل مرارها علينا نقول مرا ر ايه اللى يجينا

احنا اللى قلبنا المر لشهد ونورنا الدرب بخطاوينا