اولا :لازم نعرف منو الصاحب ومنو الصديق
الصاحب: لغويا تاتي كلمة الصاحب من الصحبة يعني مثل صحبة طريق او رحلة فاذا انتهى الطريق او الرحلة انتهت الصحبة فهي مؤقتة بتوقيت الرحلة وليست دائمة.
اما الصداقة فهي غير شكل عن الصحبة وبيها درجات فيقالصديق صدوق معناه صديق مقرب وصادق يعني الصديق طول العمر وطول الاوقات مو مؤقت بوقت وانما بكل الاوقات.
وثانيا:
وحتى نعرف الفرق اكثر راح نذكر مواقف ونشوف شلون يتصرف الصاحب والصديق ......
الصاحب : من تكعد انت الصبح ميجي على بالك الا لمن تشوفة فتسلم عليه عادي ويجوز اذا بالك مشغول تمر من يمة ومتشوفة
الصديق : من تكعد ببالك مية شغلة تريد تحجيهااله او تريد تاخذ رايه وتضل تباوع عالطريق لحد ميجي ومن تشوفه تنسى اكيد (الاصحاب) وكانما جنت كاعد وياهم غصب وجاك الفرج
الصاحب : من يشوفك مهموم يسالك شبيك تقلة منايم زين يقلك مبين عليك عيونك وارمة
الصديق : من يشوفك من بعيد بلا ميشوف عيونك يعرف بيك شي وماكو حاجة يسال لان هوة اصلا يعرف شبيك ويضل محتار شلون يواسيك ويخفف عنك يعني همك همه
الصاحب : يقول لصاحب اخر اشو فلان مو على بعضة يرد عليه الاخر هو هيج كضى عمرة مبوز فيقلة دمشي نكضي وكت دنعرف شبيه يمكن مظروب بوري
الصديق : الصاحب يسال صديقك ويقله شبيه فلان مو على بعضة اليوم يرد عليه لود هواي بالشغل وعندة امتحانات الله يساعدة (اكيد مو هذا السبب ومراح يتجرا يساله أي سؤال اخر لان الصاحب يعرف انو هذا صديقك وما ممكن ينطي بيك او احد يتجرا يحجي كلمة بحقك كدامة )

الصاحب : يشوفك لنهاية الدوام مو على بعضك يرجع لبيتة نايم رغد ولا تجي على باله
الصديق : يتحرش بيك طول اليوم مرة يسال مرة يواسي مرة يشجع مرة ينكت وانت مثل ماانت يرجع للبيت ولسة على باله ويشبعك مسجات وموبايلات وكانما وجعك بقلبه ومايرتاح الا لمن يسمع ضحكتك ويشوفها مرسومة على وجهك ويدعيلك بكد ميدعي لنفسه
الصاحب : بس الله يوفقك يقلك بالعافية وشايف كل الخير وتشوفة فرحان فرح اخ لاخوه وكانما تؤام روحك وراك يقول شلون بخت الله موفقه حضوض
الصديق: يفرحلك ويخاف عليك ويقول يارب مينساني من الله وفقه لان هو وياك اكثر بوقت الشدة من وقت الرخاء ولانك تعنيله اكثر مما تتصور ومو لانو مواثق بيك وبقوة صداقتكم وانما لان بهيج حالة يكثر حولك الاصحاب والله يسترمن سوالفهم ولان الصديق بالرخاء مطمئن عليك وممكن يبعد فترة لو حس بتغير من ناحيتك بس عمرة مراح يكون بعيد بس يكون محتاج يحس انك لسة مثل الاول ومحتاج تمدله ايدك حتى لو من بعيد

ما قبل الاخير: اقول ان الصديق رفيق الروح ودواء الجروح والحمد الله انو الله خلقهم والاخرون هم ضلال تلقاهم في الضوء ويختفون في الظلمة
اخيرا : احب ان اشكر اصدقائي الاثنين الصدوقين واتمنى اعرف العالم كله عليهم لانهم قدوة لكل الناس ادعيلهم دوم بالخير وان يحفظهم إلي دوم مو يوم واذا كان عدكم اصدقاء فتمسكوا بيهم لان إلي مثلهم قليلين جدا اذا عجبكم الموظوع فاعرفوا ان له تابع.