لحظة نسيان 



في ليلة من ليالينا
والدنيا بتلف بينا
لقيت القلب بيعدي
على حته من ماضينا

وراني كل اللي فات
من فرح وحكايات
وفين كتبنا أسامينا
قبل العمر بساعات

فكرني بأيام زمان
أيام الحب اللي كان
عدت قدام عينينا
في لحظة من النسيان

قبل ما يفرقنا الفراق
وتموت فينا الأشواق
وننسى اللي هوينا
وإن يوم كنا عشاق

ذكريات عمرها ماترجع
في القلب بس بتوجع
مركب من غير مينا
شراعها عمره مايركع

كان حب كبير بالقلب
بس ماعرفش يحب
خلانا وياه بكينا
لما ضيعنا الحب

كان حلم جميل مشيناه
بدمنا زمان كتبناه
حفرناه بخط إيدينا
وجوة قلوبنا رسمناه

لكن خسارة كان حلم
وفوقنا منه للعلم
لما ع الأرض رسينا
والحب كان فيه إسم

أهي دنيا وبيها عدينا
وياما كتير قاسينا
عمرها ماكانت بتهدي
ولا تعرف فين أراضينا



صائغ القوافي