مجلة بشرى الأدبية الأليكترونية – الشاعر والأديب الكبير / صائغ القوافي - قصيدة : النهاردة السبت

 النهاردة السبت 



قال إيه النهاردة يوم السبت
أمال إمبارح ياجيرانا كان إيه
بيعدي بينا الوقت بالوقت
وبننسى نعد ونعد وراه لياليه
الدنيا بتفحت فينا فحت
واللي عنده شيطان مجاريه
اللي كان فوق بقى فينا تحت
واللي كان تحت ربنا معليه
كنت جاي فيها بقيت رحت
ولا عارف كنت غلطان بإيه
دنيا عجيبه مليانه بالسحت
والحرامي كترت علينا بلاويه
ياللي بتنحت في لحمنا نحت
حرام عليك قوي نحتك يابيه
كنت شاب وبعمايلك شيخت
وشيطانك علينا دايمآ مقويه
بكل كذبك ياما كنت سرحت
حتى غشك مصدقك فيه
رغم عارف كذبك برضك فرحت
قلت أعيش كم يوم بحكاويه
قول ياقوال ياللي ياما مدحت
خلي الدنيا تعدي و جرى إيه
قتلت فيها ولا بقولك جرحت
كله حيشيل وراه مساعيه
دنا في صوت الناي سبحت
وفوضت أمري لربي أشكيه
ماتفرقش فوق بقى ولا تحت
كله حيوقف وترسى مراسيه
ياللي بتكحت بالدنيا كحت
رزقك جييك ماتخفش عليه
دي المايه اللي بيها مسحت
مكتوبالك بس بلاش تعاديه
ربك رب قلوب وهو شرحت
كله بأمره بس كمان تدعيه
مهما بكيت ولا يوم إنشرحت
كله بأمر رب الكون حتلاقيه
ماتقولش خلاص إنبطحت
إدعي ربك بس وبقربك راضيه
صدقني لو الف مرة إتلحت
وإبنك معرفتش يوم تربيه
إلجأ يا واد لربك حتقول إرتحت
وهو وحده اللي يقدر يهديه
قول صباح الخير مهما طحت
حيرجعلك الصباح اللي باديه
دي الدنيا اللي فيها ناطحت
دنيا فانيه بلاش قلبك تغليه
حافظ على عيالك واللي نكحت
والباقي بسعيك حتوصل ليه
أسف يا خال إن كنت جنحت
بقولي عليك اللي مخبيه
لكن بصراحه بقولي داه إرتحت
وشلت عني هم كنت مداريه



صائغ القوافي