دلوقتى بس أقدر اقولك
إنى لا يمكن تانى ارجعلك
إيه يخلينى اتحمل ذُلك
لازم اشوفلي حبيب من بعدك
كنت لوحدك بس الساكن
جوة القلب و جوة الروح
و ماليش أى حبيب تانى لكن ..
غصبٍ عنى انا كلى جروح
إنت ف حبك كنت أنانى
كنت عايشلي ف عالم تانى
و كنت بتوهم نفسك بيه
كنت عايزنى أعيشلك فيه
كنت بتكدب مليون كدبة
و كنت بصدق كل كلامك
كنت بشوف ف عنيك القسوة
و انا بتعذب ويا غرامك
إزاى بس انا كنت هطاوعك
عاللى عملته و عاللى ناويه
و انت الغدر دا كان من طبعك
قولى انا ذنبي ف حبك إيه
قلبي الطيب كان بيحبك
بعت الحب و دست عليه
كل حياتك ..
كنت عايشها خِلف خلاف
لما بقرب .. كنت بخاف
كنت فاكرنى رهن اشارتك
وقت ما تؤمر هجرى عليك
كنت فاكرنى لعبة ف إيدك
تلعب بيها و تشتاق ليك
لا يا حبيبي انا مش لعبة
انا بنى ادمة ليها مشاعر
مش راح اموت من غير معاليك
مش راح أآمن تانى لخاين
و عمرى ما هرجع أبدا ليك !!
الشاعرة هناء نوار
