بدوّر فيّا عن نفسي
لقيت واحدة ما تشبهنيش
و بصرخ لاجل تسمعنى
و الاقيها ما تسمعنيش
بفتّش فيها عن روحى
دى هربانة بقالها سنين
و أعيش ضدين
بيتقاسموا ضلوع واحدة
و متصاحبين على الوحدة
و تجمعهم دموع العين
بضفّر فرحتى بالخوف
و باخد ضحكتى بالدين
و حشكى لمين
و أنا عينى فِ وقت الشوف
ما تلمحش ِ غير الخاينين
و بزرع ورد فِ إديّا
و بغرس فيه بحنية
ألاقى الشوك محاصرنى
و ألاقى الظلم يكسرنى
و أدوّر عاللى ينجدنى
ما بلقاش حد
و بفرش للحياة سِكة
توصّلنى لمليون سَد
و بطلب رحمة مِ الأيام
ألاقى الرحمة شئ ما يجيش
و ساعتها اللى فِ اديها
عقاربها بتلدغنى
ما ترحمنيش
فلازم أكون .. سلاح مسنون
عشان اقدر معاكو أعيش
و احصّن نفسي بدروعى
عشان سيفكم
ما يدبحنيش
الشاعرة هناء نوار
