كونك حاسس انك شخصية كارتونية ف عالم واقعي 

دا شئ مش لطيف بالمرة..

حاجات كتير محتاج تعرفها علشان تحافظ علي حياتك أطول فترة ممكنة...

زي إن لو عربية خبطتك مش هتبقي مجرد رسمة ع الأرض..

الكلام مش بيطلع واضح ف بلالين فوق راس اللي بيكلمك..

لكن محتاج يكون معاك قاموس...

لو مشيت ورا أحلامك ونطيت من آخر دور

مفيش شمسية هتحميك م السقوط..

مفيش ورق ياناصيب كسبان...

البط هنا طائر بيتنتف ريشة ويطبخ ويتاكل..

والفيران بنسمها أو بنضربها بالمقشة..

العصافير بتتحط ف اقفاص وماعندهاش معامل لاختراعاتها..

والكلاب بتتربط من رقبتها والعيال بتجري وراها ف الشارع...

فيه ناس كتير هتقابلهم قلوبهم متكسرة

من غير ماتبان مقسومة نصين...

فيه ناس هتحبهم من غير ماعنيك تتحول لقلبين...

ماينفعش تفجر أي حاجة بتكرهها..

قرش الحظ مايشتريش قرطاس لب..

مفيش دليل فيه حل لكل حاجة زي دليل الكشافة...

فيه حاجات محبطة اكتر من الشغل ف مصنع السمن....

#عمرو_مرزوق