الصاحب*****
******
حبى لأصحابى حب عباده
وشوقى ليهم بزياده
وابعت سلاماتى تتهادى
اصلى فى الحب قلبى ضعيف
وغشيم فى حبى ومش حريف
حبى مليان دفا وحنيه
وشوقى يبان فى عنيه
يحس بيه اللى حوليه
*****
ولماوقعت على وشى
بصيت حواليا ما لقيتشى
حد يقولى معلشى
******
بقت كلمه وجعانى
ومربوطه فى لسانى
ولا قادر اقول اه يانى
من غدر اصحابى وخلانى
******
محبوسه فى صدرى يشكيها
ومش قادر اسكت واخبيها
ولا قادر اقولها واحكيها
******
وانا اللى طول عمرى مصاحب
وفى الدنيا ليا ميتين صاحب
ولما جه وقت الشده
مالقتشى جنبى ولا صاحب
اسمعها منى يا صاحبى
مش اى حد يتصاحب
*******
على حافظ
