😜رد رسالة لسان الغاز😜
رد المغترب لزوجته بعد استلامه لرسالة لسان الغاز الي كانت من تاليفى انا حسن عمر العطبراوى وناس كتاااار سرقوها😁👊🏽
حسن عمر العطبراوى
الرساله حزينه جد
وتوضح الحال الصعب
قريتا سايق فى الطريق
ربك ستر وما اتقلب
ياخ صاحبي كان تعبان رقد
لمن قريت قام فنترب
اتزكر امو مع الصفوف
وقشقش دموعو بعد سكب
دى رساله جننت الكفيل
رساله حيرت العرب
بصراحه مفروض اى زول
فى الدنيا يتمتع( لهب)
الغاز ده يرقد فى البيوت
دواليب ..جلوس يبقي الخشب
لو دايره تعملي للملاح
فى البيت ضيوف قاعدين ضهب
لازم تكون متوفره
انبوبه غاز مليانه تب
كيفن تكون فيهو الصفوف
بعد الطبع فيهو اتخرب
عارفه امبارح ضهر
انا صاحبي فى المكتب ضرب
لى مرتو فى الخرطوم هناك
طلبت سريع شحنة خشب
دايره كان كردان ثمين
قالتلو ياخ انسي الدهب
بقيتا محتار فى اللبن
فورانو كيف لو زول حلب
رجعتو لي شاى الفحم
وولعتو لي نار القصب
سمعنا قالو لو العريس
لعرستو اتقدم طلب
بقي شرط شان ترضى العروس
ويكسب رضاهو ابو النسب
لازم يكون ماهر شديد
مهارتو زى رمضان عجب
يجري ويجيب الغاز سرييييع
ولو ما قدر م اظن خطب
بس انتى امشي وفرقي
بي فوق صفيح ساخن رجب
اخر كلامى بقولو ليك
لازم اقول مين الكتب
ده حسن عمر من عطبره
بقصايدو كم من زول كذب
وانا ماشي عمره قريب شديد
هناك حأدعو وبي ادب
تسترنا يا رب العباد
وتمرقنا من هذا المطب
حسن عمر العطبراوى
ساحة النقاش