لسا ن الغاز(3)

حسن عمر العطبراوى

الشى المهم ما قلتو ليك

وليهو انت ما ظنيت حسب..

فى اشاعه طالعه كتيير شديد..

وفيها اى قروب كتب..

قالو سعر الغاز بزيد.... سبعين وزايد خمسه تب..

اتعزز الليمون زماااان

وورونا ليك عز الحطب

واى حطاب يبقى بس

زى اى صايغ حق دهب

وحصلت مأسي احكيها ليك

الزاكى طلق بت وهب..عازملو مره ضيوف كتااار  

فرحان فريقو امس غلب..

جاب ليها لحمه وجاب خضار

وجاب كيس فحم وحزمة خشب..

جوهو الضيوف متخمخمين وواحدين كمان جايين ضهب

صينيتو شالا علي الضيوف

رفع الغطا  والراس ضرب..

لقي ليهو صحنين بس كبااااار

مكبوبه فيها الدكوه كب..

والطماطم فيهو زيت

قرررب يدوخ ساكت غضب..

وتبريرا كان منطق شديد

حساسيه دار ترمينى رب..

ديكا انبوبتك هنااااك

املاها من عز العرب

طوالي راح رامى الطلاق

الزاكى عارفو براك صعب....

وفى اقتصاد حاصل شديد

الشاى اريتو الماتشرب..

ويومو التروح داير لبن

ساخن بكون عز الطلب..

المويه من الدش عدييل

وما دافيه حتى لو التهب.

تطلع من الحمام يمين

ترجف تقول عود القصب..

من تانى ودعنا الصفوف

دى مليان جد قلة ادب..

كمان زحيح من الصباح

داك اندفر وداك انضرب..واخر كلامى بقولو ليك

الزياده اخير من التعب..

حسن عمر العطبراوى