نتلاقى وين ؟؟؟
نتلاقى وين ؟؟
ضل السحاب
ماخت بصمه على الجروف
لا غنت اسراب النوارس
نقرت افراح الدفوف
لو ريحة الطين فى الجروف
لسع بتنضح خير وفال
لو موجة النيل راقصت
نخلا متكى سبيطو شال
لو العيون رجعت غفت
احلاما ما صبحت محال
نتلاقى يوم باكر اكيد
وافراحنا تصبح كرنفال
نتلاقى فى ضحكة طفل
بيغنى ماشى المدرسه
نتلاقى فى بيوت الفريق
البلمحنه مملسه
فى ضحكة الناس البساط
القاومت ليل الاسى
فى حلم اتنين عاشقين
ماعاشو يوم لحظة قسى
فى غفوة الرمش السهر
ليل العذاب الطال زمن
فى رفه لى جنحين فراش
سوى العبير سكنه ووطن
فى ضحكة الزول البسيط
لو كان فصيح او كان رطن
فى دفء اصابع فى سلام
دافى وحنين مافيهو ظن
زكريا صالح عطبراوى
ساحة النقاش