ماسك قلم ..
ماسك ورق ..
بكتب جواب
تاهت حروفي من الغياب
واتبعترت فوق السطور
حبّة نقط رمز العذاب
لكن بحاول أرتجل
رغم ان قلبي ف اكتئاب
واسأل سؤال
يا هل ترى قلبك مازال
بيغنّي إسمي ف دقّته ؟
يا هل ترى حُضنك مازال
مشتاق لحُضني و ضمّته ؟
يا هل ترى بُكره النهار
هييجيني يحدف ضحكته ؟

واللا الدموع صبحت طريق
ونهاري غطّاه الضباب ؟
ماسك قلم ...
ماسك ورق ...
بكتب جواب
شايف ملامحك ع السطور
وكأن جوّه الورقه نور
ومرايه عاكسه كل شئ
هنا ضحكتك ..
ع السطر طالعه كأنها
لحظة خروج البدر
م الليل الغميق
هنا كُحلتك ..
من بين عيونك رسمها
إسطورة الزمن العتيق
طب ليه بترميني ف طريق

وبتعلني منه انسحاب ؟ّ
ماسك قلم ...
ماسك ورق ...
بكتب جواب
لكني حاسس باضطراب
وسؤال بيهدم كل شئ
مع إنه لسّه بيبتدي
إيه السبب
خلاكي فجأه تبعدي ؟
د الحُب حاسم ف القرار
ليه انتي فيه تترددي ؟
ضلّيتي قلبي ف سكتك
مع إنه راحلك يهتدي
مش غلطتك ..
لكن مؤكد غلطتي
أوّل ما نجم الحُب بان

سلّمت قلبي لدنيتك
من غير ضمان
وادي النتيجه المفزعه
قلبي اللي كان جنّة حنان
دلوقتي هان
وما عادش للأشواق مكان
واضح كمان
إني بليد قوي ف الحساب
وعشان كده
ماسك ورق ...
ماسك قلم ..
بكتب جواب
بس الدموع نزلت طوفان
باش الورق
بقلم /سيد منيرعطيه