حـَلـّفتـِك برحمـِة قلبـِك
لو كان عايش
أو كان مات
ما تخلـّيش العمر يعدّى
ينقـَص يخلـَص
كدة فى سـُكات
ما تخليش الحزن يعشـِّش
فى قلوب تعشق طولة عمرك
حتى ان كانت تدفع روحها
وتـَمـَن حبك ألف ممات
حـَلـِّفتك بطولة بالك
على خيبة تقطيع أوصالك
وقت ما كـُنتى تربى عيالك
والدنيا بتـِضحك على حالك
وانت تقولى دة عـَدّى وفات
لسة التعلب عايش بيننا
بس ف ديله ألوف لفات
حلفتك بالعيش والملح
ما تصحـّيش فى قلوبنا الجرح
وتضحـِّى بقلوب عاشقاكى
إستقوى بالفاضل منهم
أسكنى حتى ف نن عيونهم
إوعى تسلمى باقى الفرح
حلفتك واحلف بالله
عمرى الضايع فيكى وتاه
مش حزنان أبداً على عمرى
واشقى واضيع شريان قلبى
بس ضنايا ازاى القاه ؟
لو يرضيكى ؟ ونضيع فيكى ؟
مش هنقول فينك يا حياة ؟
حلفتك وانا روحى بتطلع
وكلاب على فرشك تتمطع
آخر نظرة ف عينى عليكى
آخر نبضة بإسمك سمت
شهقة روح فى ضلوعى تسمع
خلينى جوة القبر اطمن
حرمت عيشتى وجوعى واجعنى
توبى الدايب لابسه مرقع
وابقى ف قبرى وكفنى مقطع ؟
والله حرام
فبلاش بكرة كمان يتوجع