المكمورة
كتبها نبيل خالد سعيد خصاونة ،
اليوم يا حبايبي يا قرايبي بدي اسولفلكوا عن طبخة كنا نساويها زمان ايام الشتوية وكانت امي تقول يمه هاي الاكلة بتسقي مي وبالصيف حامية
انها المكمورة، وهي أكلة اردنية بامتياز وما بظن انه في حدا بالعالم بنافسنا
فيها
يلا معي خلينا نبلش واول اشي بدي اخبركوا عن مكوناتها
بدك تجيب طحين اسمر طاحنه بمطحنة من تبعات قبل ام قشاط واياك تحط عليه خميرة خليه عويص احسن ولا تنسا تحط على العجين شوية زيت اللي زيتها مشان تمد معك وما تغلبك طبعا المي بدك من بير من بيار القديمة ويفضل من سيح رومي ودشر العجينة ترتاح وتعال اقولك شو تساوي عبين ما العجين يتريح
بدك ادور على ديج بلدي اصلي ابو عرف طويل والله هذاك النهار شفت عند اخوي سعيد واحد لايق وصدره نافخ اذا صحلك واحد مثله غني بعبك واذبحه على طرف سنسله وخليه يطير بعد ما تحزه واياك توديه على معاطة ترى بزورق لحمه سخن شوية مي واقعد بفية التينه والا تحت المعرش ومعمطه على راحتك ولا تنسى تشلوطه على ببور من تبعات زمان ابيه والله بقيت اكيف على ريحة الشلوطة وبعدين يقصوا الجرين الصفر يقشروهن ويضحكوا علينا واحنا صغار يقولولنا مفيدا للمفاصل مشان يسكتونا شوي المهم ما علينا بعد ما تشلوط الديج وتطول القانصة والكبدة لا ترميهن هذول بتحلوسهن مع البصلات وبتسكت فيهن جوعك وبتقطعه ثمن قطع مشان كل واحد يطلعله حصة
خلصنا من الديج يلا تعال معاي وهر حفنة دموع وانت بتقشر بصل من اللي كان ابوي يزرعهن كان كل راس منهن ينزل دموع بلد بتظل تفرم بصل تا يخدرن اديك واياك تنسى تمسح خشومك لاني شايفهن سايلات من الحرورة
خلصنا يلا جيب البصل والديج وحط عليهن زيت مع رشه حوايج اسود وملح من الخشن تبع زمان اللي كان يطلع بكياس واهم اشي بتحط سماق ورشة هيل وقليهن وقلبهن تا تزل مية الديج ويتغير لونه ولا تخليه يستوي كثير
دشرهن على جنب يبردن وتعال نرق العجينه بعد ما نسويها اقراص سبع والا ثمانية مش مهم بعدين بنجيب طنجرة المنيوم بدون ايدين بنرق اول عجينة بارضها وبندهنها من تحت زيت وبنحط طيقة بصل وكم قطعة جاج وبنغطيهن بطبقة عجين ودهنا بزيت واخر طبقة لازم تكون عجين
امي زمان كانت تغطيها بغطا الطنجرة وتلف على دايرها عجين مشان ما يهرب بخار لكن اليوم مش مهم بتقدر تغطيها بقصدير
وبتظل بوجهك لعندي بعد ما اكون احميت فرن الحطب بدسها جواته قدر ساعتين قول ثلاث حسب عمر الديج وخلي النار عالهدا تا منه يصير الخبز بلون الدبور
والف صحة وعافية
