اذان الشايب

كتبها نبيل خالد سعيد خصاونة ،

اليوم يا حبايبي طبختنا سهلة وطيبة كثير وكانت امي الله يسلمها تساويها دائما اول يوم برمضان وتقول لازم نبدا رمضان ببياض والمقصود يعني اي طبخة فيها لبن مشان البركة واكثر اكله كانت مشهورة هي اذان الشايب اللي اليوم صاروا يستحوا باسمها ويسموها ششبرك وهاظا الاسم اني ما بحبه لانه ما دخللي من زور وترى ديروا بالكوا هاي الاكلة من الاكلات المتوارثه اب عن جد ويا رب تعلموها كلكوا لاولادكوا
كنا ما نصدق وامي تبلش فيها ونتحاوط حواليها وريحة اللحمة البلدية تفحفح وامي تحلوس فيها على نار هادية مشان ما تلزق ويوصل فينا الجوع للاخر لما تطرف امي الجميد وتشم ريحته من اخر الحارة
لذلك اليوم اني بدي اشرحلكوا طريقتها من اولها لتاليها
اول اشي بدنا نجيب طحين قمح اصلي اسمر وشوية ملح وندير عليهن كاسة مي ونعجنهن تمنها تصير العجينة متماسكة واوعى تساويها رخوة والا عمرها ما بتزبط وبنخليها ترتاح حوالي الساعة ولازم تكون عويص يعني ما حدا يحط خميرة
هسع بدنا نزبط الحشوة اللي بتتكون من لحمة بلدية مفرومة فرمة متوسطة وبنفرم عليها راسين بصل مع رشة ملح وشوية بهارات واهمها الفلفل الاسود اللي بعطي نكهة مميزة للحمة واياكوا تحطوا كمون ترى بنزع طعمتها واذا دقيت سن ثوم للي بحب ما بضرش واذا فيه بالحوض زارع شوية كزبرة افرملك عرقين او حط رشة كزبرة ناشفة مطحونة . طبعا اللي بعده بستعمل الصنوبر بقدر يضيف حفنه على اللحمة بعد ما تتحلوس واللي نسي طعمته خليه ناسي احسنله وبنظل نحلوس باللحمه على نار هادية بدون ما نغطيها لانها اذا تغطت بتزنخ حتى تنشف ميتها وطبعا اكيد بكون ريقك نشف من الروايح اللي ضاربه بنخاشيشك وبعد ما تستوي بتفردها بماعون وسيع مشان تبرد
واخر اشي بدنا نجيب الجميد الممروس على الايد مش على الخلاط لانه بحثرب وانا ما بحب طعمته الا ممروس واذا ما فيه جميد بتنفع مع شنينه او لبن بقر وبتطرف الجميد او اللبن حتى يغلي واذا استعملت لبن لا تنسى تضيف عليه بيضه مشان ما يفرفط
والحين بدنا نرجع للعجينه اللي تركناها تتخمر بنجيبها وبنرش عليها شوية طحين مشان ما تلزق وبنرقها بالشوبك حتى تصير رقيقه وسمكها ما يزيد عن 3 مل وبعدين بنجيب فنجان بابه كبير وبنقطع العجينه دوائر وبكل قطعة بنحط شوي من الحشوة وبنسكرها مزبوط وبنلف طرفينها على بعض مشان توخذ شكل اذن الشايب او بالمعنى الحديث شكل الصدفة وبعد ما نخلص الكمية كلها بندبها باللبن وبنخليها تغلي غلوتين
اللي بحب يقلي سن ثوم مع كزبرة ويرش على وجهها بصير واللي ما بحب هو حر انا ما بجبر حدا وبنستنى لما يقرب وقت الاذان وبنصبها بصينية او جاط بايركس من اللي بحفظ الحرارة ولا تنسوا صحن الفجل واذا فيه شوية مخلل على كم حبة زيتون اسود بجنبها وصحتين وعافية
ويا ريت تعجبكوا وادعولي